پاکستان کی بگ برڈ نے برآمدات کا بڑا معاہدہ حاصل کر لیا، عالمی حلال مارکیٹ پر چھانے کے لیے پرعزم

پاکستان میں پولٹری پروسیسنگ کے معروف ادارے بگ برڈ فوڈز لمیٹڈ (بی بی ایف ایل) نے خلیجی ممالک کی ایک بڑی حلال فوڈ کمپنی کو پولٹری مصنوعات برآمد کرنے کا ایک بڑا معاہدہ حاصل کر لیا ہے۔

پاکستان اسٹاک ایکسچینج (پی ایس ایکس) میں درج اس کمپنی نے جمعرات کو جاری ایک نوٹس میں اس اہم پیش رفت سے آگاہ کیا۔نوٹس کے مطابق بگ برڈ فوڈز لمیٹڈ یہ اعلان کرتے ہوئے انتہائی خوشی محسوس کر رہی ہے کہ کمپنی نے خلیج میں قائم ایک حلال فوڈ کمپنی سے خام چکن (را چکن) اور مزید پروسیس شدہ پولٹری مصنوعات کی فراہمی کا ایک بڑا برآمدی آرڈر حاصل کر لیا ہے۔

کمپنی کا کہنا ہے کہ اس آرڈر سے ان کی موجودہ برآمدات کا حجم تقریباً دوگنا ہونے کی توقع ہے، جبکہ پیداواری صلاحیت میں اضافے اور مصنوعات کی نئی اقسام متعارف کروانے سے اس میں مزید بڑھوتری کا امکان ہے۔اعلامیے میں بتایا گیا ہے کہ موجودہ تخمینوں کے مطابق اس معاہدے سے کمپنی کی سالانہ آمدنی میں 1.2 ارب روپے کا مزید اضافہ متوقع ہے۔

کمپنی کے مطابق عالمی حلال فوڈ مارکیٹ کا حجم اس وقت سالانہ 900 ارب ڈالر سے زائد ہے جس کے 2034 تک بڑھ کر 1.4 ٹریلین (لاکھ کروڑ) ڈالر سے تجاوز کرنے کی توقع ہے، جو بین الاقوامی معیار کے حامل پروسیسنگ پلانٹس رکھنے والے اداروں کے لیے طویل مدتی ترقی کے شاندار مواقع پیش کرتا ہے۔ دوسری جانب مالی سال 2026 میں پاکستان کی سالانہ گوشت کی برآمدات 50 کروڑ ڈالر سے تجاوز کرنے کی امید ہے۔کمپنی نے مزید کہا کہ عالمی حلال فوڈ مارکیٹ میں تیز رفتار ترقی کے پیشِ نظر پاکستان برآمدات بڑھانے کے لیے انتہائی موزوں پوزیشن میں ہے۔ کمپنی کو خلیجی ممالک کے ساتھ ہونے والے ان معاہدوں سے بڑا فائدہ پہنچے گا، جس سے زرمبادلہ کے ذخائر میں اضافہ ہوگا اور کمپنی کی آمدنی کے ذرائع مزید وسیع ہوں گے۔

بگ برڈ فوڈز لمیٹڈ کا قیام ستمبر 2011 میں ایک پرائیویٹ لمیٹڈ کمپنی کے طور پر عمل میں آیا تھا، جسے یکم جون 2023 کو پبلک لمیٹڈ کمپنی میں تبدیل کر دیا گیا۔ یہ کمپنی مقامی اور بین الاقوامی منڈیوں کے لیے معیاری چکن مصنوعات بشمول پروسیس شدہ، پکانے کے لیے تیار (ریڈی ٹو کک) اور کھانے کے لیے تیار (ریڈی ٹو ایٹ) اشیاء تیار، درآمد، برآمد اور سپلائی کرنے میں مہارت رکھتی ہے۔کمپنی کا مقصد بڑھتی ہوئی مقامی اور برآمدی طلب کو پورا کرنے کے لیے اپنی پیداواری صلاحیت کا بھرپور استعمال کرنا اور بین الاقوامی صارفین کی ترجیحات کے مطابق مصنوعات کی نئی اقسام متعارف کروانا ہے۔