ڈسکوز کی نجکاری میں کراچی کے تجربے کو نہیں دہرانا چاہیے

پاکستان انٹرنیشنل ایئرلائنز (پی آئی اے) میں اکثریتی حصص کی فروخت مکمل کرنے کے بعد حکومت اب ایک ایسے لین دین کی طرف بڑھ چکی ہے جو کہ کہیں زیادہ مشکل ہے اور یہ سرکاری بجلی کی تقسیم کار کمپنیوں (ڈسکوز) کی نجکاری کا عمل ہے۔

پی آئی اے سے ملنے والا سبق یہ نہیں ہے کہ نجکاری اچانک آسان ہو گئی ہے بلکہ سبق یہ ہے کہ کوئی بھی خریدار کسی کاروبار کی قیمت کا تعین اسی وقت کرے گا جب اس کے واجبات، آپریٹنگ حقوق، ریگولیٹری سلوک اور مستقبل کی سرمایہ کاری کی ضروریات مکمل طور پر واضح ہوں۔ پی آئی اے کی دوسری کوشش اسی وقت کامیاب ہوئی جب ماضی کے قرضوں کو الگ کیا گیا، ٹیکس اور لین دین کی شرائط پر نظر ثانی کی گئی، بین الاقوامی روٹس دوبارہ کھولے گئے اور ایئرلائن کی مالی حالت کو بہتر بنایا گیا۔ ریاست کو پہلے اس کاروبار کو قابلِ فہم اور واضح بنانا پڑا۔

بجلی کی تقسیم کاری کے شعبے کو بہت بڑے پیمانے پر اسی طرح کے نظم و ضبط کی ضرورت ہوگی۔ ایک ایئرلائن کے برعکس بجلی کی تقسیم کار کمپنی ایک ناگزیر نیٹ ورک مونوپولی (اجارہ داری) کے تحت کام کرتی ہے۔ اس کے صارفین محض یہ فیصلہ نہیں کر سکتے کہ وہ بجلی استعمال نہ کریں، جبکہ کمپنی کا آپریٹر بھی آزادانہ طور پر یہ انتخاب نہیں کر سکتا کہ وہ کس کو بجلی فراہم کرے گا یا کیا چارجز وصول کرے گا۔

پہلے مرحلے میں فیسکو، گیپکو اور آئیسکو شامل ہیں، جن میں حکومت انتظامی کنٹرول کے ساتھ ہر کمپنی کے 51 سے 100 فیصد تک حصص کی پیشکش کر رہی ہے۔ مجموعی طور پر یہ تینوں کمپنیاں 1 کروڑ 40 لاکھ سے زائد صارفین کو خدمات فراہم کرتی ہیں۔ اس لیے سرمایہ کار قیمتی نیٹ ورکس اور کسٹمر بیس تو خرید رہے ہوں گے، لیکن ساتھ ہی انہیں سیاسی طور پر حساس ٹیرف، سروس کی ذمہ داریاں، بوسیدہ انفرااسٹرکچر، ملازمین کے واجبات اور نقصانات و ماضی کے اخراجات کے بوجھ تلے دبے پاور سسٹم کا حصہ بھی وراثت میں ملے گا۔یہیں پر کے الیکٹرک کا تجربہ اہمیت اختیار کر جاتا ہے۔ کراچی میں غلطی بذاتِ خود نجی ملکیت نہیں تھی۔ اس سے سنگین غلطی یہ تھی کہ ایک مربوط اجارہ داری کی نجکاری اس وقت کر دی گئی جب اس اجارہ داری کو چلانے والا ریگولیٹری معاہدہ مکمل طور پر جامع اور قابلِ اعتماد نہیں بنایا گیا تھا۔

کے الیکٹرک نے نجکاری کے بعد بعض آپریٹنگ اشاریوں خاص طور پر ٹرانسمیشن اور ڈسٹری بیوشن کے نقصانات (لائن لاسز) میں یقیناً بہتری دکھائی۔ اس کے باوجود ٹیرف، سرمایہ کاری، بجلی کی خریداری، حکومتی ذمہ داریوں، سروس کے معیار اور ملکیت کے تنازعات برسوں سے برقرار ہیں۔ صارفین اب بھی عدم اطمینان کا شکار ہیں، جبکہ سرمایہ کاروں کا استدلال ہے کہ ریگولیٹری اور پالیسی کی غیر یقینی صورتحال نے طویل مدتی سرمایہ کاری کے لیے فنڈز حاصل کرنے کی کمپنی کی صلاحیت کو متاثر کیا ہے۔ دونوں اپنی اپنی جگہ درست ہو سکتے ہیں جب اصل معاہدہ بہت سی چیزوں کو مستقل گفت و شنید پر چھوڑ دیتا ہے۔

پاکستان کو ملک بھر میں اس قسم کے انتظامات کو دوبارہ نہیں دہرانا چاہیے۔ بولیاں جانچنے سے پہلے نیپرا اور وفاقی حکومت کو اس کاروبار کی واضح تعریف کرنی چاہیے جسے بیچا جا رہا ہے۔ خریداروں کو ایک قابلِ عمل کثیر سالہ ٹیرف فریم ورک، سرمایہ کاری کی واضح ذمہ داریاں، نقصانات میں کمی کا طریقہ کار، سروس کے معیار کے معیارات اور انتظامی کنٹرول سے باہر کے اخراجات کے لیے خودکار ایڈجسٹمنٹ کے طریقہ کار کی ضرورت ہے۔ صارفین کو لوڈ شیڈنگ، بلنگ، نئے کنکشن، حفاظت اور معاوضے کے حوالے سے قابلِ عمل قوانین کی ضرورت ہے۔ حکومت کو یہ بھی واضح کرنا چاہیے کہ وہ کن سماجی ذمہ داریوں کے لیے خود فنڈز فراہم کرے گی، بجائے اس کے کہ انہیں خاموشی سے یوٹیلیٹی کمپنی پر منتقل کر دیا جائے۔

ملکیت تبدیل ہونے سے پہلے ریگولیٹر کو مضبوط بنانا ہوگا، بعد میں نہیں۔ بینکوں کی نجکاری اس لیے کامیاب ہوئی کیونکہ اسٹیٹ بینک نے عوامی ڈپازٹس پر چلنے والے نجی اداروں کی نگرانی کی صلاحیت پیدا کر لی تھی۔ بجلی کے شعبے کو بھی اسی طرح کے ایک معتبر ریگولیٹر کی ضرورت ہے، لیکن یہ کام زیادہ مشکل ہے کیونکہ ہر نیٹ ورک ایک قدرتی اجارہ داری (سپلائی یا سروس فراہم کرنے کے لیے صرف ایک ہی کمپنی یا ادارہ سب سے زیادہ سستا اور موثر ثابت ہوتا ہے)ہے۔ نیپرا کے پاس پیشہ ور عملہ، ڈیٹا سسٹمز، خودمختاری اور نفاذ کے اختیارات ہونے چاہئیں جو اجارہ داری کے ذریعے حاصل کیے جانے والے ناجائز منافع اور جائز منافع میں اور حکومتی پالیسی کے باعث ہونے والے اخراجات اور حقیقی نااہلی میں فرق کرنے کے لیے ضروری ہیں۔

کاروبار کی ساخت پر بھی توجہ دینے کی ضرورت ہے۔ پاکستان کا قانون پہلے ہی بجلی کی تقسیم کو بجلی کی فراہمی سے الگ کرتا ہے، لیکن عملی طور پر یہ تقسیم اب بھی بڑی حد تک نامکمل ہے۔ نیٹ ورک اور ریٹیل کے کاروبار کو آپریشنل اور مالیاتی طور پر ایک دوسرے سے الگ کیا جانا چاہیے۔تاروں کا نیٹ ورک سنبھالنے والی کمپنی کو ایک ریگولیٹڈ اجارہ داری رہنا چاہیے۔ یہ نیٹ ورک کی دیکھ بھال کرے گی، کنکشن فراہم کرے گی، بجلی کی میٹرنگ کرے گی اور تمام لائسنس یافتہ سپلائرز کو بلا تفریق رسائی فراہم کرے گی۔ اس کی آمدنی سسٹم کے شفاف استعمال کے چارجز اور موثر سرمایہ کاری و کارکردگی سے منسلک طے شدہ منافع سے ہونی چاہیے۔ رائٹ آف وے کو لیز پر دینے، میٹرنگ کو بہتر بنانے اور نیٹ ورک سروسز کو ترقی دینے جیسے مواقع اس آمدنی میں اضافہ کر سکتے ہیں، لیکن بنیادی منافع ایک قابلِ اعتماد اور موثر گرڈ چلانے سے ہی حاصل ہونا چاہیے۔

بجلی کی سپلائی کا کاروبار وہ جگہ ہے جہاں بتدریج مقابلہ متعارف کرایا جا سکتا ہے۔ مسابقتی سپلائرز کو بجلی پیدا کرنے والے اداروں اور تاجروں کے ساتھ معاہدے کرنے چاہئیں، ریگولیٹڈ ٹرانسمیشن اور ڈسٹری بیوشن چارجز ادا کرنے چاہئیں اور صارفین کو قیمت، مدت، بھروسے اور رسک کے مختلف پیکجز پیش کرنے چاہئیں۔ آخری چارے کے طور پر سپلائران صارفین کو خدمات فراہم کرتا رہے گا جو تبدیل نہیں کرتے یا جو ابھی تک مقابلے کے اہل نہیں ہیں۔

اس تبدیلی کا آغاز بڑے صنعتی اور تجارتی صارفین سے ہونا چاہیے، بجائے اس کے کہ فوری طور پر بڑے پیمانے پر ریٹیل مارکیٹ میں مقابلہ پیدا کرنے کی کوشش کی جائے۔ اہل ہونے کی اس حد کو بعد میں کم کیا جا سکتا ہے جیسے جیسے سیٹلمنٹ سسٹمز، میٹرنگ، سپلائر کی ضمانت کی ضروریات اور صارفین کے تحفظ کے طریقہ کار پختہ ہوتے جائیں۔ ان سسٹمز کے وجود میں آنے سے پہلے مسابقتی مارکیٹ کا اعلان کرنا حقیقی مقابلہ پیدا کیے بغیر محض مالیاتی ثالث پیدا کرنے کے مترادف ہوگا۔سب سے مشکل مسئلہ ملکیت کا نہیں، بلکہ ماضی کے اخراجات کی تقسیم کا ہے۔ پاکستان کے بجلی کے ٹیرف میں کیپیسٹی چارجز، کراس سبسڈیز، دہائیوں سے جمع ہونے والی تاریخی نااہلیاں اور سماجی ذمہ داریاں شامل ہیں۔ اگر مسابقتی سپلائرز کو ان اخراجات میں حصہ ڈالے بغیر سب سے زیادہ ادائیگی کرنے والے صارفین کو لے جانے کی اجازت دی گئی تو باقی رہ جانے والی یوٹیلیٹی کمپنی کے پاس صرف کمزور صارفین اور ایک تیزی سے دیوالیہ ہونے والی بیلنس شیٹ رہ جائے گی۔ ایسی صورت میں مقابلہ اس شعبے کے مالیاتی زوال کو حل کرنے کے بجائے اس میں تیزی لائے گا۔ لہٰذا ریگولیٹڈ سپلائر کو چھوڑنے والے کسی بھی صارف کو ناگزیر نیٹ ورک، پھنسے ہوئے اور عبوری اخراجات کا ایک شفاف حصہ ادا کرتے رہنا چاہیے۔ اس کے ساتھ ہی کم آمدنی والے گھرانوں کے لیے سبسڈیز کو تجارتی اور صنعتی ٹیرف کے اندر چھپانے کے بجائے واضح طور پر بجٹ کا حصہ اور ہدف بنانا چاہیے۔ سماجی پالیسی حکومت کی ذمہ داری ہے، اسے یوٹیلیٹی کی قیمتوں کا بھیس نہیں دیا جانا چاہیے اور پھر اسے غیر ادا شدہ نہیں چھوڑا جانا چاہیے۔

پاکستان، سعودی عرب، ترکیہ یا چین کے سرمایہ کاروں کی دلچسپی حوصلہ افزا ہے، لیکن دلچسپی کسی قابلِ عمل لین دین کا ثبوت نہیں ہوتی۔ سنجیدہ سرمایہ کار ٹیرف کی پائیداری، نقصانات کے ساتھ سلوک، ریگولیٹر کی خودمختاری، حکومتی وعدوں کے نفاذ اور طویل سرمایہ کاری کے افق پر اپنا سرمایہ واپس حاصل کرنے کی صلاحیت کا جائزہ لیں گے۔ ان سوالات کو موخر کرکے حاصل کی جانے والی ایک بڑی بولی محض ایک مالیاتی سراب ہوگی۔

حکومت کو نجکاری کے عمل کو قومی سطح پر اجارہ داری کے ارتکاز کو دوبارہ پیدا کرنے سے بھی روکنا ہوگا۔ جسمانی نیٹ ورکس علاقائی اجارہ داریاں ہی رہیں گے، لیکن مسابقتی سپلائی کو بالاخر ان علاقائی حدود کو عبور کرنے کے قابل ہونا چاہیے۔ اس لیے ملکیت کے قوانین کو ایک چھوٹے گروپ کو کئی نیٹ ورکس کو کنٹرول کرنے کے ساتھ ساتھ بجلی کی فراہمی پر حاوی ہونے سے روکنا چاہیے۔اس نجکاری کا امتحان فروخت سے حاصل ہونے والی رقم نہیں ہوگی بلکہ یہ ہوگا کہ آیا یہ لین دین ریاست کو پوشیدہ مالیاتی واجبات واپس منتقل کیے بغیر پائیدار سرمایہ کاری، کم موثر نقصانات، بہتر سروس اور مقابلے کی طرف ایک معتبر راستہ پیدا کرتا ہے یا نہیں۔

پاکستان کو ایک واضح طور پر بیان کردہ اور مناسب طریقے سے ریگولیٹڈ کاروبار فروخت کرنا چاہیے۔ اسے ایک غیر حل شدہ سیاسی سودے بازی کو بیچ کر اس تبدیلیِ ملکیت کو اصلاحات کا نام نہیں دینا چاہیے۔

کاپی رائٹ : بزنس ریکارڈر 2026