قطر کا امریکہ ایران مذاکرات میں ثالثی کا کردار برقرار رکھنے کا عزم

قطر کے وزیراعظم شیخ محمد بن عبدالرحمن آل ثانی نے اس عزم کا اعادہ کیا ہے کہ ان کا ملک امریکہ اور ایران کے درمیان مفاہمتی یادداشت (ایم او یو) سے جنم لینے والے مذاکرات کے تمام مراحل کی حمایت جاری رکھے گا اور ثالثی کی اپنی کوششیں بھی برقرار رکھے گا۔ قطر کی وزارت خارجہ نے منگل کو یہ بات ایک بیان میں بتائی۔

شیخ محمد بن عبدالرحمن آل ثانی نے یہ بات امریکی نمائندہ اسٹیو وٹکوف اور امریکی صدر ڈونلڈ ٹرمپ کے داماد جیرڈ کشنر سے ملاقات کے دوران کہی، جس میں امریکہ اور ایران کے درمیان جاری مذاکرات کی پیش رفت پر تبادلہ خیال کیا گیا۔

وزارت خارجہ کے بیان میں ملاقات کی تفصیلات یا مذاکرات کے مندرجات کے بارے میں مزید معلومات فراہم نہیں کی گئیں۔