وزیراعظم کی فوجی سربراہان کو عید کی مبارکباد، مسلح افواج کی قربانیوں کو سراہا

وزیرِاعظم شہباز شریف نے بدھ کے روز چیف آف ڈیفنس فورسز و چیف آف آرمی اسٹاف عاصم منیر، چیف آف ائیر اسٹاف ظہیر احمد بابر اور چیف آف نیول اسٹاف نوید اشرف کو عید الاضحیٰ کی مبارکباد پیش کی اور مسلح افواج کی قربانیوں اور قومی سلامتی کے لیے ان کے عزم کو خراجِ تحسین پیش کیا ہے۔

وزیرِاعظم آفس کے مطابق انہوں نے سروسز چیفس کے ساتھ الگ الگ ٹیلی فونک گفتگو میں مسلح افواج کی پیشہ ورانہ صلاحیتوں کو سراہا اور ملک کے دفاع کے لیے ان کی خدمات کو تسلیم کیا۔

وزیرِاعظم نے کہا کہ ”قوم اپنے بہادر سپاہیوں اور پاکستان کی مسلح افواج کے غیر متزلزل عزم اور قربانیوں پر فخر کرتی ہے۔“

انہوں نے عید کے موقع پر ڈیوٹی سرانجام دینے والے افسران اور اہلکاروں کو خصوصی خراجِ تحسین پیش کرتے ہوئے کہا کہ وطن کے دفاع کے لیے ان کی خدمات قومی خدمت اور قربانی کے جذبے کی عکاس ہیں۔

وزیرِاعظم نے ملک کی سلامتی، ترقی اور خوشحالی کے لیے دعا کی اور مسلح افواج اور ان کے اہل خانہ کو عید کی نیک تمنائیں بھی دیں۔

عسکری قیادت نے وزیرِاعظم کی عید مبارکباد کا شکریہ ادا کرتے ہوئے قوم کے لیے امن، خوشحالی اور نیک خواہشات کا اظہار کیا۔

وزیرِاعظم ہاؤس کے مطابق مسلح افواج نے ملک کے دفاع اور سلامتی کے لیے ہر وقت مکمل طور پر تیار رہنے کے اپنے عزم کا اعادہ بھی کیا۔

اس سے قبل وزیرِاعظم نے عوامِ پاکستان اور امتِ مسلمہ کو بھی عید کی مبارکباد دیتے ہوئے کہا تھا کہ قربانی، اتحاد اور یکجہتی کا جذبہ قومی ہم آہنگی اور پائیدار ترقی کے لیے ناگزیر ہے۔