یو اے ای کا آبنائے ہرمز کو بائی پاس کرنے والی نئی تیل پائپ لائن کے منصوبے کو تیز کرنے کا فیصلہ

سرکاری میڈیا کے مطابق متحدہ عرب امارات نے آبنائے ہرمز کو بائی پاس کرنے والی نئی تیل پائپ لائن کی تعمیر کو تیز کرنے کا فیصلہ کیا ہے، یہ اقدام مشرقِ وسطیٰ کی جنگ کے باعث اہم آبی گزرگاہ سے برآمدات متاثر ہونے کے بعد کیا گیا ہے۔

ابوظہبی میڈیا آفس نے بتایا کہ ویسٹ ایسٹ پائپ لائن ریاستی تیل کمپنی ایڈنوک (ADNOC) کی فجیرہ بندرگاہ کے ذریعے تیل کی ترسیل کی صلاحیت کو دوگنا کرے گی اور توقع ہے کہ یہ اگلے سال فعال ہو جائے گی۔

ابوظہبی کے ولی عہد شیخ خالد بن محمد بن زاید النہیان نے ایڈنوک کو اس منصوبے کی جلد تکمیل کی ہدایت جاری کی ہے۔

فجیرہ بندرگاہ کی ویب سائٹ کے مطابق حَبشان آئل فیلڈز سے فجیرہ تک موجود 360 کلومیٹر (224 میل) طویل پائپ لائن کی یومیہ گنجائش 18 لاکھ بیرل ہے۔

متحدہ عرب امارات، جس نے ماہ کے آغاز میں اوپیک آئل کارٹل سے علیحدگی اختیار کر کے عالمی توجہ حاصل کی، آئندہ سال تک اپنی یومیہ تیل پیداوار کی صلاحیت کو 50 لاکھ بیرل تک بڑھانے کا منصوبہ رکھتا ہے۔

مشرقِ وسطیٰ کی جنگ کے دوران فجیرہ میں تیل کی تنصیبات کو بارہا نشانہ بنایا گیا ہے۔ 4 مئی کو ہونے والے تازہ حملے میں تین بھارتی شہری زخمی ہوئے تھے۔