پی اینڈ جی کا انخلا: جیلیٹ پاکستان نے پی ایس ایکس سے ڈی لسٹنگ کی درخواست دے دی

جیلیٹ پاکستان لمیٹڈ نے پاکستان اسٹاک ایکسچینج (پی ایس ایکس) سے ڈی لسٹنگ اور اقلیتی شیئر ہولڈرز کے حصص خریدنے کی منظوری کے لیے باضابطہ درخواست دے دی ہے۔

کمپنی نے یہ اقدام بدھ کو اسٹاک ایکسچینج کو جاری کردہ نوٹس میں ظاہر کیا۔

کمپنی کے اکثریتی شیئر ہولڈر، پراکٹر اینڈ گیمبل (پی اینڈ جی)، جو اپنی ذیلی کمپنی ایس اے بی وی کے ذریعے جیلیٹ پاکستان کے 91.72 فیصد حصص کی ملکیت رکھتی ہے نے بائی بیک عمل شروع کر دیا ہے۔

بیان میں کہا گیا کہ تجویز کردہ ڈی لسٹنگ پی اینڈ جی کی عالمی کوششوں کا حصہ ہے، جس کا مقصد گروتھ اور ویلیو کریشن کو تیز کرنا ہے۔ کمپنی نے پاکستان میں اپنے کاروبار اور آپریٹنگ ماڈل کو تبدیل کرنے اور صارفین کو خدمات فراہم کرنے کے لیے تھرڈ پارٹی ڈسٹری بیوٹر ماڈل پر منتقل ہونے کا فیصلہ کیا ہے۔

اس کا مطلب یہ ہے کہ جیلیٹ پاکستان لمیٹڈ کی مینوفیکچرنگ اور تجارتی سرگرمیاں ختم کر دی جائیں گی، اور صارفین کو خطے میں کمپنی کے دیگر آپریشنز کے ذریعے خدمات فراہم کی جائیں گی۔

نوٹس کے مطابق، مقامی ذیلی کمپنی اپنے کاروباری آپریشنز بند کر دے گی اور اس کا پی ایس ایکس پر لسٹنگ برقرار رکھنا پیرنٹ کمپنی کی عالمی حکمت عملی سے مطابقت نہیں رکھتا۔

تجویز کردہ منصوبے کے تحت ایس اے بی وی اقلیتی شیئر ہولڈرز کے پاس موجود 2,638,059 حصص (جو کمپنی کے ادا شدہ سرمائے کا تقریباً 8.28 فیصد بنتے ہیں) کو فی شیئر کم از کم 216.49 روپے کی قیمت پر خریدنے کا ارادہ رکھتی ہے جس کا تعین قواعد و ضوابط کے ضابطہ 5.14.1 کے مطابق کیا گیا ہے۔

نوٹس میں مزید کہا گیا کہ خریداری کا ایجنٹ عارف حبیب لمیٹڈ مقرر کیا گیا ہے۔

جیلیٹ پاکستان کا مجاز شیئر کیپٹل 400 ملین روپے ہے، جو 40 ملین عام حصص میں تقسیم ہے، ہر حصص کی قیمت 10 روپے ہے، اور ان میں سے 31.87 ملین حصص جاری اور مکمل طور پر ادا شدہ ہیں۔

گزشتہ ماہ کمپنی نے اعلان کیا تھا کہ اس کی پیرنٹ کمپنی،پروکٹر اینڈ گیمبل عالمی ری اسٹرکچرنگ منصوبے کے تحت پاکستان میں اپنے کاروباری آپریشنز بند کر دے گی۔

پی اینڈ جی ایک امریکی عالمی صارفین کی اشیاء بنانے والی کمپنی ہے، جس کی بنیاد 1837 میں رکھی گئی تھی۔ یہ کمپنی پیمپرز، ٹائیڈ، جیلیٹ، اور ہیڈ اینڈ شولڈرز جیسی برانڈز کے لیے مشہور ہے۔

علیحدہ بیان میں پی اینڈ جی نے کہا کہ وہ پاکستان میں اپنی مینوفیکچرنگ اور تجارتی سرگرمیوں کو بند کر دے گی اور جنوبی ایشیا میں صارفین کی خدمت جاری رکھنے کے لیے تیسرے فریق کے تقسیم کاروں پر انحصار کرے گی۔

جون میں پی اینڈ جی نے اعلان کیا تھا کہ وہ عالمی سطح پر آئندہ دو سال کے دوران اپنے غیر مینوفیکچرنگ عہدوں میں سے تقریباً 7 ہزار ملازمتیں یا 15 فیصد کی کمی کرے گی جو اس کے غیر بنیادی ری اسٹرکچرنگ پروگرام کا حصہ ہے۔