پاکستان، پرتگال بزنس فورم 23 نومبر کو اسلام آباد میں ہوگا
- اقدام کا مقصد پاکستانی اور پرتگالی کاروباری اداروں کو ایک مشترکہ پلیٹ فارم فراہم کرنا ہے
پاکستان اور پرتگال 23 نومبر 2026 کو اسلام آباد میں بزنس فورم کا انعقاد کریں گے جس کا مقصد دوطرفہ تجارت اور سرمایہ کاری کو فروغ دینا، کاروباری روابط کو آسان بنانا اور معیشت کے اہم شعبوں میں تجارتی مواقع کی نشاندہی کرنا ہے۔
خصوصی سرمایہ کاری سہولت کونسل (ایس آئی ایف سی) نے اس فورم کے انعقاد اور انتظامات کے لیے مشترکہ ورکنگ گروپ (جے ڈبلیو جی) تشکیل دے دیا ہے۔ یہ فورم پرتگال کے وزیر خارجہ کے دورۂ پاکستان کے موقع پر منعقد ہوگا۔
ایس آئی ایف سی ڈویژن کی جانب سے جاری سرکاری نوٹیفکیشن کے مطابق یہ فورم اسلام آباد میں پرتگال کے سفارت خانے کے اشتراک سے منعقد کیا جارہا ہے جس میں پرتگال کے کاروباری وفد کی شرکت متوقع ہے۔
اس اقدام کا مقصد پاکستانی اور پرتگالی کاروباری اداروں کو ایک مشترکہ پلیٹ فارم فراہم کرنا ہے تاکہ وہ ممکنہ شراکت داری، سرمایہ کاری کے مواقع اور دوطرفہ تجارتی تعلقات کے فروغ کے امکانات تلاش کر سکیں۔
سرمایہ کاری کے لیے ترجیحی شعبوں میں زراعت اور زرعی خوراک، توانائی، ادویہ سازی، انفارمیشن ٹیکنالوجی، ٹیکسٹائل، کھیلوں کا سامان اور جراحی کے آلات شامل ہیں۔
ایس آئی ایف سی نے متعلقہ وزارتوں سے کہا ہے کہ وہ اپنے اپنے شعبوں کی سات سے 10 نمایاں کمپنیوں کی نشاندہی کریں جو بزنس فورم میں شرکت کرسکیں اور ان کی تفصیلات فراہم کریں تاکہ دورے پر آنے والے پرتگالی کاروباری وفد کے ساتھ براہ راست روابط اور ملاقاتوں کو ممکن بنایا جا سکے۔




















Comments