اکتوبر میں ریکارڈ ذخائر کی توقعات، پام آئل کی قیمتوں میں کمی کا سلسلہ جاری

ملائیشین پام آئل کے مستقبل کے سودوں کی قیمتیں بدھ کو ایک فیصد سے زائد گر کر جون کے وسط کے بعد کی کم ترین سطح پر آگئیں جس کی وجہ ریکارڈ بلند ذخائر کی توقعات اور دالیان مارکیٹ میں پام اولیئن کی کمزور قیمتوں کے باعث قیمتوں پر دباؤ تھا۔

برسا ملائیشیا ڈیریویٹوز ایکسچینج میں جنوری میں ترسیل کے لیے پام آئل کا بینچ مارک معاہدہ دوپہر کے وقفے تک 55 رنگٹ یا 1.21 فیصد کمی کے بعد 4,496 رنگٹ (1,103.31 ڈالر) فی میٹرک ٹن پر آگیا، اس طرح قیمتوں میں مسلسل تیسرے کاروباری سیشن میں بھی کمی ریکارڈ کی گئی۔

کوالالمپور میں مقیم ایک تاجر کے مطابق منگل کو کیے گئے جائزوں میں گزشتہ ماہ پام آئل کے اختتامی ذخائر ریکارڈ بلند سطح پر پہنچنے کا امکان ظاہر کیے جانے کے بعد مارکیٹ میں مندی کا رجحان برقرار رہا۔

رائٹرز کے ایک سروے کے مطابق ملائیشین پام آئل کے ذخائر ستمبر کے ریکارڈ 35 لاکھ 10 ہزار ٹن کے مقابلے میں 6.8 فیصد اضافے سے 37 لاکھ 50 ہزار ٹن تک پہنچنے کا امکان ہے۔

تاجر نے کہا کہ رات کے دوران دالیان مارکیٹ میں پام اولیئن کی قیمتوں میں کمزوری نے بھی منفی رجحان کو تقویت دی، جس کی ایک وجہ خام پام آئل کے مستقبل کے سودوں کی قیمتوں میں کمی تھی۔

دالیان مارکیٹ میں سویا آئل کے سب سے زیادہ کاروبار والے معاہدے کی قیمت 1.6 فیصد جبکہ پام آئل کے معاہدے کی قیمت 3.21 فیصد گر گئی۔