سری لنکا کی پاکستان کے خلاف بڑی فتح، انگلینڈ کی سیمی فائنل میں رسائی کی امیدیں ختم

فاسٹ بولر دلشان مدوشنکا نے کیریئر کی بہترین بولنگ کرتے ہوئے 34 رنز دے کر 5 وکٹیں حاصل کیں، جس کی بدولت سری لنکا نے منگل کے روز لاہور میں پاکستان کو 8 وکٹوں سے عبرتناک شکست دے کر سہ ملکی سیریز کے فائنل میں انگلینڈ کی رسائی کی امیدیں ختم کر دیں۔

بائیں ہاتھ کے فاسٹ بولر کا اسپنر سہان آراچیگے نے بھرپور ساتھ دیا، جنہوں نے 24 رنز دے کر 2 وکٹیں حاصل کیں۔ دونوں بولرز کی عمدہ کارکردگی کے باعث پاکستان کی پوری ٹیم صرف 25.3 اوورز میں 110 رنز پر ڈھیر ہوگئی۔ سری لنکن بلے بازوں نے ہدف محض 18.1 اوورز میں حاصل کر لیا۔

تین میچوں میں سری لنکا کی یہ دوسری فتح ہے، جس کے نتیجے میں سہ ملکی سیریز کی تیسری ٹیم انگلینڈ اتوار کے روز ہونے والے فائنل کی دوڑ سے باہر ہوگئی۔ پاکستان پہلے ہی تین فتوحات کے ساتھ فائنل میں جگہ بنا چکا ہے۔

انگلینڈ کو سری لنکا اور پاکستان کے خلاف مسلسل دو میچوں میں جیت کی پوزیشن سے شکست کا سامنا کرنا پڑا تھا۔ فائنل میں رسائی کی امید برقرار رکھنے کے لیے انگلینڈ کو میزبان پاکستان کی فتح درکار تھی، تاکہ وہ بھی فیصلہ کن معرکے میں جگہ بنا سکے۔

اس نتیجے کے بعد جمعرات کو سری لنکا اور انگلینڈ کے درمیان ہونے والا میچ محض رسمی کارروائی رہ گیا ہے، کیونکہ اس کا فائنل کی ٹیموں کے تعین پر کوئی اثر نہیں پڑے گا۔

کامنڈو مینڈس نے 60 گیندوں پر ناقابلِ شکست 62 رنز کی اننگز میں دو چھکے اور آٹھ چوکے لگائے۔ انہوں نے شاہین شاہ آفریدی کی گیند پر چھکا لگا کر ون ڈے انٹرنیشنل میں اپنی پانچویں نصف سنچری مکمل کی۔ پون رتنائیکے 23 رنز بنا کر ناٹ آؤٹ رہے۔

اوپنر اویشکا فرنینڈو 16 رنز بنا کر آؤٹ ہوئے، جبکہ کپتان کوشل مینڈس صرف آٹھ رنز بنا سکے۔ شاہین شاہ آفریدی اور عرفات منہاس نے ایک، ایک وکٹ حاصل کی۔

کوشل مینڈس نے اپنے بولرز کی کارکردگی، خصوصاً دلشان مدوشنکا کی بولنگ کو سراہا۔

مینڈس نے کہا، ’’ہم نے اپنے منصوبوں پر اچھی طرح عمل کیا اور دلشان نے شاندار بولنگ کی۔ ٹیم کی پیش رفت سے ہر کوئی خوش ہے۔‘‘ ان کی ٹیم نے جمعرات کے روز انگلینڈ کے خلاف 430 رنز کا ہدف حاصل کیا تھا، جو ون ڈے انٹرنیشنل کرکٹ میں کامیاب تعاقب کا دوسرا بڑا مجموعہ ہے۔

اپنی ٹیم کی مایوس کن کارکردگی کے باوجود شاہین شاہ آفریدی نے حوصلہ برقرار رکھنے کی کوشش کی۔

شاہین نے کہا، ’’ہمیں یہ میچ بھلا کر فائنل کی تیاری کرنی ہوگی۔ ہم فائنل میں بھرپور واپسی کریں گے اور بہتر بیٹنگ کریں گے۔‘‘

اس سے قبل مدوشنکا کی تباہ کن بولنگ نے پہلے بیٹنگ کرنے والی پاکستانی ٹیم کو مشکلات سے دوچار کر دیا۔ پاکستان کے 110 رنز ون ڈے انٹرنیشنل میں ہوم گراؤنڈ پر اس کا دوسرا کم ترین مجموعہ ہے۔ اس سے قبل اسی حریف کے خلاف اسی مقام پر 2009 میں پاکستانی ٹیم صرف 75 رنز پر آؤٹ ہوئی تھی۔

پاکستان نے اتوار کے روز انگلینڈ کے خلاف سنسنی خیز مقابلے میں ایک وکٹ سے کامیابی حاصل کرتے ہوئے 242 رنز کا ہدف پورا کیا تھا، تاہم قذافی اسٹیڈیم کی بیٹنگ کے لیے سازگار پچ پر اس بار بلے باز بری طرح ناکام رہے۔ بابر اعظم 29 رنز کے ساتھ ٹاپ اسکورر رہے، جبکہ حسن نواز نے 17 رنز بنائے۔

مدوشنکا نے چوتھے اوور میں خراب فارم کا شکار اوپنر فخر زمان کو پانچ رنز پر آؤٹ کرکے وکٹیں گرنے کا سلسلہ شروع کیا۔

بابر اعظم اور سعد بیگ نے تیسری وکٹ کے لیے 23 رنز جوڑے، تاہم مدوشنکا نے سعد بیگ کو پانچ رنز پر کور میں کیچ آؤٹ کرا دیا۔ دوسری جانب سہان آراچیگے نے سلمان آغا کو نو رنز پر پویلین بھیج دیا۔

اگلے اوور میں بابر اعظم ایشان ملنگا کی گیند پر ایل بی ڈبلیو ہوگئے۔

مدوشنکا نے شاہین شاہ آفریدی (15 رنز) اور حارث رؤف (ایک رن) کو آؤٹ کرکے پاکستان کو معقول مجموعے تک پہنچنے سے روک دیا اور پانچ وکٹیں حاصل کرنے کا اعزاز اپنے نام کیا۔

مدوشنکا کی اس سے قبل بہترین بولنگ بھارت کے خلاف 2023 کے ورلڈ کپ میں ممبئی کے مقام پر 80 رنز دے کر پانچ وکٹیں حاصل کرنا تھی۔