انگلش کوچ میکولم کا پیٹرسن سے ٹیم میں بڑی تبدیلیاں لانے کا مطالبہ

انگلینڈ کے وائٹ بال ہیڈ کوچ برینڈن میک کولم نے نئے مقرر کیے گئے مینٹور کیون پیٹرسن سے ٹیم میں بڑی تبدیلیاں لانے کا مطالبہ کرتے ہوئے کہا ہے کہ اگر سابق ایشز اور ٹی 20 ورلڈ کپ فاتح بلے باز کے پاس ٹیم کی کارکردگی بہتر بنانے کے لیے کوئی تجاویز ہیں تو وہ کھل کر سامنے لائیں۔

پیٹرسن کو گزشتہ ہفتے مینٹور مقرر کیا گیا تھا اور وہ سری لنکا کے خلاف سیریز سے قبل کوچنگ اسٹاف میں شامل ہوگئے۔ ان کی ذمہ داریاں آئندہ سال ہونے والے ون ڈے ورلڈ کپ تک جاری رہیں گی۔

میک کولم نے کہا کہ پیٹرسن کا بطور کھلاڑی شاندار ریکارڈ ہے اور کئی کھلاڑی انہیں اپنا آئیڈیل سمجھتے ہوئے بڑے ہوئے ہیں۔ انہوں نے کہا کہ پیٹرسن نے گزشتہ 24 گھنٹوں میں ٹیم کے ماحول میں نئی توانائی پیدا کی ہے۔

انہوں نے کہا کہ وہ پیٹرسن کو کسی ایک شعبے تک محدود نہیں رکھنا چاہتے بلکہ چاہتے ہیں کہ وہ مجموعی ماحول کا جائزہ لیں اور ٹیم کو بہتر بنانے کے طریقوں پر نجی طور پر ان سے اختلاف یا تجاویز پیش کریں۔

نیوزی لینڈ سے تعلق رکھنے والے میک کولم کو جولائی میں انگلینڈ کے ٹیسٹ کوچ کے عہدے سے ہٹا دیا گیا تھا۔ ان کے دور میں بین اسٹوکس، ہیری بروک اور گس اٹکنسن سمیت نمایاں کھلاڑیوں سے متعلق تنازعات بھی سامنے آئے۔ حال ہی میں پاکستان کے خلاف 3-0 سے ٹیسٹ سیریز جیتنے کے دوران فاسٹ بولر برائیڈن کارس کو نائٹ کلب کے باہر ایک واقعے کے بعد ٹیسٹ اسکواڈ سے بھی باہر کردیا گیا تھا۔