ڈالر کے مقابلے میں روپیہ تگڑا

انٹربینک مارکیٹ میں جمعہ کو ڈالر کے مقابلے میں روپیہ مزید مضبوط ہوگیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 277.32 روپے پر بند ہوا۔

یاد رہے کہ جمعرات کو مقامی کرنسی 277.36 روپے پر بند ہوئی تھی۔

ادھر عالمی سطح پر جمعہ کو ایشیائی کاروبار کے آغاز پر امریکی ڈالر گزشتہ ایک ہفتے کی بلند ترین سطح کے قریب رہا، جبکہ ین مسلسل دوسرے روز کمزور ہوا۔ مشرق وسطیٰ میں توانائی کی فراہمی میں خلل کے نئے خدشات کے باعث بانڈز کی پیداوار اور تیل کی قیمتوں میں اضافہ ہوا۔

چھ بڑی کرنسیوں کے مقابلے میں ڈالر کی قدر جانچنے والا امریکی ڈالر انڈیکس 99.081 پر رہا۔ جمعرات کو انڈیکس میں 0.3 فیصد اضافہ ہوا تھا اور یہ 7 ستمبر کے بعد بلند ترین سطح پر پہنچ گیا تھا۔

یہ اضافہ امریکی اعداد و شمار کے اجرا کے بعد ہوا، جن کے مطابق اگست میں امریکی پروڈیوسر قیمتوں میں 0.4 فیصد اضافہ ہوا، جو مارکیٹ کی توقعات کے مطابق تھا۔ ماہ کے دوران توانائی کی قیمتوں میں بھی اضافہ ہوا۔

کرنسی کی برابری کا اہم اشاریہ سمجھی جانے والی تیل کی قیمتیں بھی جمعہ کو بڑھ گئیں۔ مشرق وسطیٰ میں اہم بحری راستوں پر بڑھتے حملوں کے باعث سپلائی میں طویل تعطل کے خدشات پیدا ہوئے، جس سے دونوں بڑے عالمی بینچ مارکس مئی کے وسط کے بعد پہلی بار ہفتہ وار بنیاد پر 100 ڈالر فی بیرل سے زائد سطح پر بند ہونے کی راہ پر ہیں۔

0345 جی ایم ٹی تک برینٹ خام تیل کے مستقبل کے سودوں کی قیمت 81 سینٹ یا 0.8 فیصد اضافے سے 108.44 ڈالر فی بیرل ہوگئی۔

امریکی ویسٹ ٹیکساس انٹرمیڈیٹ خام تیل 69 سینٹ یا 0.7 فیصد اضافے کے بعد 103.17 ڈالر فی بیرل پر پہنچ گیا۔

جمعرات کو دونوں بینچ مارکس میں 6 فیصد سے زائد اضافہ ہوا تھا، جبکہ ہفتہ وار بنیاد پر ان کی قیمتیں تقریباً 13 فیصد بڑھ چکی ہیں، جو 17 جولائی کو ختم ہونے والے ہفتے کے بعد سب سے بڑا اضافہ ہے۔