ڈالر کے مقابلے میں روپیہ مزید تگڑا

انٹربینک مارکیٹ میں پیر کو ڈالر کے مقابلے روپیہ مزید مضبوط ہوگیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.36 روپے روپے پر بند ہوا۔

یاد رہے کہ منگل کو مقامی کرنسی 277.37 روپے پر بند ہوئی تھی۔

دریں اثنا بین الاقوامی سطح پر بدھ کو جاپانی ین فروری کے بعد اپنی مضبوط ترین سطح کے قریب مستحکم رہا، جس کے باعث ڈالر دباؤ میں رہا۔ دوسری جانب مشرقِ وسطیٰ میں بڑھتی ہوئی جنگ کے باعث تاجر خام تیل کی قیمتوں کے 100 ڈالر فی بیرل کی جانب بڑھنے سے پیدا ہونے والی صورتحال کا جائزہ لے رہے ہیں۔

یمن میں حوثیوں نے سعودی عرب کے کئی شہروں پر حملے کیے، جس سے چھ ماہ سے زائد عرصے سے جاری تنازع میں ایک اور امریکی اتحادی بھی مزید متاثر ہوا۔ ادھر امریکی فورسز نے ایران کے متعدد آئل ٹینکروں کو نشانہ بنایا، جبکہ ایران نے اردن میں ایک امریکی اڈے کو ہدف بنایا۔

کرنسی مارکیٹ میں ان واقعات کے ردعمل میں ڈالر کی قدر معمولی کم ہوئی، تاہم بعض تجزیہ کاروں کے مطابق ڈالر کی کمزوری کی بڑی وجہ گزشتہ ایک ہفتے کے دوران ین کی تیزی سے بڑھتی ہوئی قدر بھی ہے۔

یورو 1.1631 ڈالر پر مستحکم رہا، جبکہ برطانوی پاؤنڈ کی آخری قیمت 1.3546 ڈالر رہی۔

ڈالر انڈیکس، جو امریکی کرنسی کی چھ بڑی کرنسیوں کے مقابلے میں قدر کو ظاہر کرتا ہے، 98.15 پر رہا، جو تقریباً دو ہفتوں کی کم ترین سطح کے قریب ہے۔

او سی بی سی کے حکمتِ عملی کے ماہرین نے کہا کہ حالیہ کشیدگی میں اضافے کے باعث توانائی کی بلند قیمتوں کے امریکی فیڈرل ریزرو کی پالیسی پر ممکنہ اثرات بدستور توجہ کا مرکز ہیں، خصوصاً گزشتہ ہفتے امریکا میں روزگار کے مضبوط اعداد و شمار کے بعد شرحِ سود میں ایک اور اضافے کے امکانات دوبارہ بڑھ گئے ہیں۔

علاوہ ازیں کرنسی کی قدر کے لیے اہم اشاریے کے طور پر دیکھے جانے والے تیل کی قیمتوں میں بدھ کو اضافہ ہوا۔ مشرقِ وسطیٰ میں بڑھتی ہوئی کشیدگی کے باعث خطے سے تیل کی ترسیل متاثر ہونے کے خدشات بڑھنے پر بینچ مارک برینٹ خام تیل کے مستقبل کے سودوں کی قیمت 100 ڈالر فی بیرل سے تجاوز کرگئی۔ یہ 24 جولائی کے بعد پہلی بار ہے کہ برینٹ کی قیمت نے اس علامتی حد کو عبور کیا ہے۔

برینٹ خام تیل کے مستقبل کے سودوں کی قیمت میں 2.15 ڈالر یا 2.2 فیصد اضافہ ہوا اور جی ایم ٹی 0721 تک یہ 100.07 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (ڈبلیوٹی آئی) خام تیل کی قیمت 1.70 ڈالر یا 1.83 فیصد اضافے کے بعد 94.73 ڈالر فی بیرل رہی۔