پیٹرول کی قیمت میں 1.12 روپے اور ڈیزل میں 1.11 روپے فی لیٹر اضافہ

وفاقی حکومت نے پیٹرول کی قیمت میں 1.12 روپے اور ہائی اسپیڈ ڈیزل (ایچ ایس ڈی) کی قیمت میں 1.11 روپے فی لیٹر اضافہ کردیا ہے، نئی قیمتیں بدھ 26 اگست سے جمعرات 27 اگست تک نافذ العمل رہیں گی۔

وزارتِ توانائی (پٹرولیم ڈویژن) کی جانب سے جاری کردہ نوٹیفکیشن کے مطابق آئل اینڈ گیس ریگولیٹری اتھارٹی (اوگرا) نے منگل کو حکومت کے پٹرولیم مصنوعات کی قیمتوں کے تعین کے طریقہ کار کے تحت پٹرولیم مصنوعات کی ایکس ڈپو قیمتوں میں نظرثانی کی۔

پیٹرول کی قیمت میں 1.12 روپے فی لیٹر اضافہ کیا گیا، جس کے بعد اس کی قیمت 341.98 روپے سے بڑھ کر 343.10 روپے فی لیٹر ہوگئی۔

ہائی اسپیڈ ڈیزل (ایچ ایس ڈی) کی قیمت 1.11 روپے فی لیٹر بڑھا کر 370.69 روپے سے 371.80 روپے فی لیٹر کردی گئی۔

نئی قیمتیں جمعرات تک نافذ العمل رہیں گی۔ یہ اقدام حکومت کی جانب سے عالمی منڈی میں تیل کی قیمتوں اور دیگر لاگت کے عوامل کی بنیاد پر ایندھن کی قیمتوں میں مسلسل ردوبدل کی پالیسی کے تحت کیا گیا ہے۔

گزشتہ پیر کو ہونے والے جائزے میں حکومت نے پیٹرول کی قیمت میں 0.39 روپے اور ڈیزل کی قیمت میں 2.40 روپے فی لیٹر اضافہ کیا تھا۔