لیونل میسی کے والد خورخے میسی 68 برس کی عمر میں انتقال کرگئے

لیونل میسی کے والد اور ایجنٹ خورخے میسی 68 برس کی عمر میں انتقال کرگئے ہیں۔ آٹھ مرتبہ بیلن ڈی اور جیتنے والے فٹبالر کے بچپن کے کلب نیویلز اولڈ بوائز نے ہفتے کو ان کے انتقال کی تصدیق کی۔

ارجنٹائن کے میڈیا کے مطابق خورخے میسی جمعے کو روزاریو کے ایک اسپتال میں انتقال کرگئے تھے۔

نیویلز اولڈ بوائز نے سوشل میڈیا پر جاری ایک بیان میں کہا، ’’پردے کے پیچھے ان کی مسلسل رفاقت اور رہنمائی لیونل کے ہر قدم کی حمایت میں بنیادی حیثیت رکھتی تھی۔‘‘

خورخے میسی ارجنٹائن میں اپنے بیٹے کے پہلے کوچ تھے اور بچپن میں جب لیونل پہلی مرتبہ بارسلونا منتقل ہوئے تو وہ ان کے واحد ساتھی تھے۔ بعد ازاں وہ اپنے بیٹے کے ایجنٹ بھی بن گئے۔

لیونل میسی نے 2022 میں ڈیریک ٹی وی اسپورٹس کو بتایا تھا، ’’میرے والد نے میری بہت مدد کی۔ وہ مجھ پر سخت تنقید کرتے ہیں۔ اسی وجہ سے میں ہمیشہ خود کو مزید بہتر بنانے کی کوشش کرتا رہا۔‘‘

میسی کے اہل خانہ نے حالیہ ورلڈ کپ کے دوران خورخے کی صحت سے متعلق مسلسل گردش کرنے والی افواہوں کے پیش نظر میڈیا سے ’’انسانی ہمدردی‘‘ کا مظاہرہ کرنے کی اپیل کی تھی۔