رحمت شاہ افغانستان کی ٹیسٹ اور ون ڈے ٹیموں کے کپتان مقرر

مڈل آرڈر بلے باز رحمت شاہ کو افغانستان کی ٹیسٹ اور ایک روزہ بین الاقوامی (ون ڈے) ٹیموں کا کپتان مقرر کر دیا گیا ہے۔ افغانستان کرکٹ بورڈ نے بدھ کو اس کا اعلان کیا۔

قیادت میں یہ تبدیلی حشمت اللہ شاہدی کے منگل کو کپتانی سے مستعفی ہونے کے بعد سامنے آئی ہے، جس کے ساتھ ان کا پانچ سالہ دور اختتام پذیر ہوگیا۔

شاہدی کی قیادت میں افغانستان نے 2023 ورلڈ کپ میں شاندار کارکردگی کا مظاہرہ کرتے ہوئے چھٹی پوزیشن حاصل کی تھی، جبکہ سابق عالمی چیمپئن انگلینڈ، پاکستان اور سری لنکا کو شکست دی تھی۔

افغانستان کرکٹ بورڈ نے اپنے بیان میں کہا، ”افغانستان کرکٹ بورڈ حشمت اللہ شاہدی کی کپتان کی حیثیت سے خدمات، لگن اور قیادت کو سراہتا ہے اور ان کے آئندہ سفر کے لیے نیک خواہشات کا اظہار کرتا ہے۔“

بیان میں مزید کہا گیا، ”بین الاقوامی کرکٹ، قیادت اور ٹیم کے مجموعی ڈھانچے سے متعلق وسیع تجربے کی بدولت رحمت شاہ اس اہم ذمہ داری نبھانے کے لیے بہترین انتخاب ہیں۔“

رحمت شاہ، جو 2021 سے حشمت اللہ شاہدی کے نائب کپتان رہے ہیں، اپنی کپتانی کا آغاز آئندہ ماہ آئرلینڈ کے خلاف پانچ ون ڈے میچوں کی سیریز سے کریں گے۔