بھارت، برطانیہ تجارتی معاہدہ نافذ، ٹیرف میں کمی اور خدمات کے شعبے کو فروغ ملنے کی توقع

بھارت اور برطانیہ کے درمیان جامع تجارتی معاہدہ بدھ سے نافذ العمل ہو گیا، جس کے تحت ہزاروں اشیا پر درآمدی محصولات (ٹیرف) میں کمی کے ساتھ دونوں ممالک میں خدمات فراہم کرنے والی کمپنیوں اور پیشہ ور افراد کے لیے مارکیٹ تک رسائی بھی وسیع ہو گئی ہے۔

بھارت اور برطانیہ جامع اقتصادی و تجارتی معاہدے کے تحت بھارتی برآمدکنندگان کو برطانیہ میں بیشتر اشیا پر فوری طور پر ڈیوٹی فری رسائی حاصل ہو گئی ہے، جس سے ٹیکسٹائل، چمڑے، جوتے، سمندری مصنوعات، جواہرات و زیورات اور پراسیسڈ غذائی اشیا جیسے محنت طلب شعبوں کو نمایاں فائدہ پہنچے گا۔

دوسری جانب برطانیہ کو دنیا کی تیزی سے ترقی کرتی بڑی معیشتوں میں شمار ہونے والی بھارتی منڈی تک مزید رسائی حاصل ہوگی۔ معاہدے کے تحت آٹوموبائل سمیت مختلف شعبوں میں مرحلہ وار ٹیرف میں کمی اور درآمدی کوٹے متعارف کرائے جائیں گے، جبکہ سرکاری خریداری، مالیاتی خدمات، تعلیم، انشورنس اور پیشہ ورانہ خدمات کے شعبوں میں بھی نئے مواقع فراہم کیے جائیں گے۔

بھارت کے وزیرِ تجارت پیوش گوئل نے کہا کہ یہ معاہدہ تجارت، سرمایہ کاری اور جدت کے نئے مواقع پیدا کرے گا، جبکہ اس سے بھارتی کاروباری اداروں کے لیے بھی ترقی کے نئے امکانات کھلیں گے۔

برطانیہ کو بھی بھارت کی جانب سے آٹوموبائل اور الکحل والے مشروبات کی درآمد کے شعبوں میں مرحلہ وار منڈی کھولنے سے فائدہ پہنچے گا۔ معاہدے کے تحت مکمل تیار شدہ مسافر گاڑیوں کی درآمد کوٹہ نظام کے تحت ہوگی، جس کے تحت ہر سال 37 ہزار گاڑیوں کو رعایتی درآمدی محصولات پر درآمد کی اجازت دی جائے گی۔

خدمات کے شعبے سے متعلق معاہدے کے تحت 137 ذیلی شعبوں میں مارکیٹ تک رسائی میں توسیع کی گئی ہے، جن میں انفارمیشن ٹیکنالوجی، کاروباری خدمات، ٹیلی کام، مالیاتی خدمات اور تعلیم شامل ہیں۔ اس کے علاوہ کاروباری زائرین، اندرونِ کمپنی تبادلے پر آنے والے ملازمین، سرمایہ کاروں، خدمات فراہم کرنے والوں اور آزاد پیشہ ور افراد کے لیے عارضی داخلے کے قواعد بھی آسان بنا دیے گئے ہیں۔

معاہدے سے منسلک ڈبل کنٹری بیوشن کنونشن کے تحت اہل بھارتی پیشہ ور افراد اور ان کے آجر برطانیہ میں پانچ سال تک قیام کے دوران نیشنل انشورنس نظام میں شراکت کی ادائیگی سے مستثنیٰ ہوں گے، جس سے تقریباً 75 ہزار کارکنوں اور 900 آجروں کو فائدہ پہنچے گا۔

اس معاہدے کے تحت بھارتی کمپنیوں کو برطانیہ کی تقریباً 90 ارب پاؤنڈ مالیت کی سرکاری خریداری کی منڈی تک رسائی حاصل ہوگی، جبکہ بھارت بھی برطانوی کمپنیوں کو تقریباً 114 ارب ڈالر مالیت کے سرکاری خریداری کے مواقع فراہم کرے گا۔