ڈالر کے مقابلے میں روپیہ مزید بہتر

انٹربینک مارکیٹ میں منگل کو بھی ڈالر کے مقابلے روپے کی قدر میں اضافہ ریکارڈ کیا گیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 278.47 روپے پر بند ہوا۔

یاد رہے کہ پیر کو مقامی کرنسی 278.47 روپے پر بند ہوئی تھی۔

بین الاقوامی سطح پر منگل کو امریکی ڈالر کی قدر مستحکم رہی کیونکہ مارکیٹوں نے مشرقِ وسطیٰ کے امن مذاکرات کے حوالے سے انتظار کرو اور دیکھو کی حکمتِ عملی اختیار کر رکھی ہے، اگرچہ لبنان نے حزب اللہ اور اسرائیل کے درمیان محدود جنگ بندی کا اعلان کیا ہے تاہم وسیع تر جغرافیائی و سیاسی غیر یقینی صورتحال نے سرمایہ کاروں کو تذبذب کا شکار کئے رکھا۔

سرمایہ کاروں نے ایران تنازع کے خاتمے کی جانب ہونے والی کسی بھی پیشرفت کا محتاط انداز میں جائزہ لیا جس کی وجہ اپریل کے آغاز میں امریکہ اور ایران کے درمیان ہونے والی جنگ بندی کی نازک صورتحال ہے۔

ڈالر انڈیکس پیر کو لبنان کے اعلان کے بعد اپنے ابتدائی اضافے سے کچھ نیچے آگیا۔ اگرچہ یہ معاہدہ کسی حد تک کشیدگی میں کمی کا اشارہ دیتا ہے تاہم یہ ایک وسیع تر علاقائی تنازع کے پس منظر میں محدود ہی ہے جس نے آبنائے ہرمز سے تیل کی سپلائی کو متاثر کیا ہے۔

ڈالر انڈیکس 99.17 پر مستحکم رہا جبکہ یورو 0.03 فیصد اضافے کے ساتھ 1.1634 ڈالر پر پہنچ گیا اور برطانوی پاؤنڈ (اسٹرلنگ) 0.07 فیصد اضافے سے 1.346 ڈالر کا ہو گیا۔

28 فروری کو شروع ہونے والے تنازع کے آغاز پر امریکی ڈالر کی قدر میں تیزی سے اضافہ ہوا تھا جسے سیف ہیون کی مانگ اور توانائی سے پیدا ہونے والی مہنگائی سے امریکی معیشت کے نسبتاً کم متاثر ہونے کے باعث سہارا ملا تھا۔

تاہم تنازع کے مستقبل رخ کے حوالے سے غیر یقینی صورتحال کے باعث ڈالر اب اپنے اس ابتدائی اضافے کا کچھ حصہ گنوا چکا ہے۔