سندھ حکومت کا بڑا فیصلہ، دکانوں، مارکیٹس، شاپنگ مالز، ہوٹلز، ریسٹورنٹس پر وقت کی پابندیاں ختم

سندھ حکومت نے ہفتے کو ایک اہم فیصلہ کرتے ہوئے دکانوں، مارکیٹوں، شاپنگ مالز، ہوٹلوں، ریسٹورنٹس اور شادی ہالز کے لیے رات کو جلد بند کرنے کی پابندی ختم کردی۔

سندھ کے سینئر وزیر شرجیل میمن نے ہفتے کو اپنی ایک پوسٹ میں کہا کہ یہ اقدام کاروباری سرگرمیوں کو سہولت دینے اور شہریوں کو زیادہ آسانی فراہم کرنے کے لیے کیا گیا ہے۔

سینئر وزیر نے کہا کہ تاجر و صنعت کاروں کی تجاویز اور ان کی مشکلات کو مدِنظر رکھتے ہوئے یہ فیصلہ کیا گیا ہے

یہ فیصلہ معاشی ترقی، عوامی سہولت اور کاروباری برادری کی حمایت کے عزم کی عکاسی کرتا ہے جو معیشت کی ریڑھ کی ہڈی ہے۔

یاد رہے کہ اس سے قبل 10 اپریل کو سندھ حکومت نے کفایت شعاری مہم کے تحت صوبے بھر میں دکانوں، ریسٹورنٹس اور ویڈنگ ہالز کے اوقاتِ کار محدود کرنے کا باقاعدہ نوٹیفکیشن جاری کیا تھا جسے فوری طور پر نافذ کر دیا گیا تھا۔

سابقہ شیڈول کے مطابق ڈویژنل ہیڈ کوارٹرز کے علاوہ تمام اضلاع میں بازاروں، شاپنگ مالز اور دکانوں کو رات 8 بجے بند کرنے کا حکم دیا گیا تھا جبکہ ڈویژنل ہیڈ کوارٹرز کی حدود میں تاجروں کو رات 9 بجے تک کاروبار کرنے کی مہلت دی گئی تھی۔

اوقاتِ کار کی ان بندشوں کا اطلاق ہفتے کے تمام دن بشمول تعطیلات پر ہوتا تھا۔

مزید برآں ہوٹلوں اور ریسٹورنٹس کو صرف ڈنر کے اوقات یعنی شام 7 سے ساڑھے 11 بجے تک کسٹمرز کو سروس دینے کی اجازت تھی، تاہم ہوم ڈیلیوری اور ٹیک اویے کی سہولت کو اس پابندی سے مستثنیٰ رکھا گیا تھا۔