نائب وزیراعظم اسحاق ڈار کی زیر صدارت اجلاس، توانائی بچت اور کفایت شعاری کے اقدامات پر پیش رفت کا جائزہ لیا گیا

نائب وزیراعظم اور وزیر خارجہ اسحاق ڈار نے منگل کے روز ایندھن کے تحفظ اور اضافی کفایت شعاری کے اقدامات کی نگرانی کے لیے کابینہ کمیٹی کے اجلاس کی صدارت کی، جس میں حکومت کے لاگت کم کرنے کے اقدامات پر پیش رفت کا جائزہ لیا گیا۔ یہ بات ان کے دفتر نے ایک بیان میں بتائی ہے۔

متعلقہ دفتر کی جانب سے جاری ایک بیان میں کہا گیا ہے کہ اسحاق ڈار نے کفایت شعاری کے اقدامات پر عمل درآمد سے اطمینان کا اظہار کیا اور زور دیا کہ موجودہ چیلنجز کے پیش نظر تمام شعبوں کو حالات بہتر ہونے تک ایندھن کی بچت اور کفایت شعاری پر عمل جاری رکھنا چاہیے۔

انہوں نے کہا کہ کمیٹی کے سامنے صرف وہی درخواستیں لائی جائیں جو کفایت شعاری کے اقدامات سے استثناء چاہتی ہوں اور حکومت کے اہم اور وقتی نوعیت کے کام کے لیے ضروری ہوں۔

اجلاس کے دوران وفاقی وزیر برائے انفارمیشن ٹیکنالوجی نے کفایت شعاری کے اقدامات کے نفاذ کی نگرانی کے لیے تیار کردہ ڈیش بورڈ بھی پیش کیا۔

اجلاس میں وفاقی وزیر برائے آئی ٹی اور ماحولیاتی تبدیلی، وزیر اعظم کے خصوصی معاون طارق باجوہ، کابینہ ڈویژن، نیشنل سیکیورٹی ڈویژن، پیٹرولیم ڈویژن اور پلاننگ ڈویژن کے سیکرٹریز، تمام صوبوں کے چیف سیکرٹریز اور متعلقہ وزارات کے دیگر سینئر حکام نے بھی شرکت کی۔