اسلام آباد ایئرپورٹ پر پروازوں کی آمد و رفت بحال، آپریشنز دوبارہ معمول پر آگئے، پی اے اے

پاکستان ایئرپورٹس اتھارٹی (پی اے اے) کے مطابق اسلام آباد انٹرنیشنل ایئرپورٹ پر جمعہ کو آپریشنل وجوہات کی بنا پر پروازوں کا سلسلہ مختصر وقت کے لیے متاثر ہوا، تاہم اب صورتحال معمول پر آ گئی ہے۔

پی اے اے نے ایک بیان میں کہا کہ آپریشنل وجوہات کی بنا پر آج اسلام آباد انٹرنیشنل ایئرپورٹ پر پروازوں کے شیڈول میں تھوڑے وقت کے لیے معمولی تبدیلیاں کی گئی تھیں۔ اب ایئرپورٹ پر تمام پروازیں معمول کے مطابق چل رہی ہیں۔ مسافروں سے گزارش ہے کہ اپنی پروازوں سے متعلق معلومات کے لیے متعلقہ ایئرلائنز سے رابطہ کریں۔

یہ پیش رفت سوشل میڈیا پر گردش کرنے والی ان خبروں کے بعد سامنے آئی جن میں دعویٰ کیا گیا تھا کہ اسلام آباد میں زوردار دھماکوں کی آوازیں سنی گئی ہیں اور شہر کی فضائی حدود (ایئر اسپیس) کو بند کر دیا گیا ہے۔

تاہم، قبل ازیں جاری کیے گئے ایک بیان میں جو بعد میں حذف کر دیا گیا، پی اے اے نے کہا تھا کہ اسلام آباد انٹرنیشنل ایئرپورٹ پر جمعے کے روز پروازوں کے آپریشن میں مختصر وقتی خلل آیا تھا۔

پی اے اے نے کہا تھا کہ ”آپریشنل وجوہات کی بنا پر آج اسلام آباد انٹرنیشنل ایئرپورٹ پر پروازوں کے آپریشن میں مختصر وقتی معمولی ایڈجسٹمنٹ کی گئی۔ اب ایئرپورٹ کی تمام پروازیں معمول کے مطابق چل رہی ہیں۔ مسافروں سے درخواست ہے کہ اپنی پروازوں کی معلومات کے لیے متعلقہ ایئرلائنز سے رابطہ کریں۔“ یہ بیان بعد میں حذف کر دیا گیا۔