امریکی ڈالر کے مقابلے میں روپیہ مزید تگڑا

انٹربینک مارکیٹ میں جمعہ کو بھی ڈالر کے مقابلے روپے کی قدر میں بہتری ریکارڈ کی گئی ہے۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 279.47 روپے پر بند ہوا۔

یاد رہے کہ جمعرات کو مقامی کرنسی 279.50 روپے پر بند ہوئی تھی۔

عالمی سطح پر آسٹریلوی ڈالر جمعہ کو مسلسل دوسرے ماہ نمایاں اضافے کیلئے تیار نظر آیا کیونکہ مرکزی بینک کی جانب سے سخت مانیٹری پالیسی کی توقعات بڑھ رہی ہیں۔ دوسری جانب جاپانی ین گراوٹ کی جانب گامزن رہا کیونکہ بینک آف جاپان کو ایک ایسے پرعزم وزیر اعظم کا سامنا ہے جو معیشت میں نئی روح پھونکنے کی پالیسیوں کے حامی ہیں۔

اس ماہ سرمایہ کاروں کو کئی اہم چیلنجز کا سامنا کرنا پڑا جن میں جغرافیائی سیاسی کشیدگی ، ٹرمپ ٹیرف کے حوالے سے امریکی سپریم کورٹ کا کلیدی فیصلہ اور مصنوعی ذہانت کی تجارت میں اتار چڑھاؤ سمیت دیگر اہم پیش رفت شامل ہیں۔

تاہم رواں ماہ کرنسیوں کی قدر میں ہونے والی تبدیلیاں بنیادی طور پر شرح سود کے بدلتے ہوئے اندازوں کے باعث تھیں۔

آسٹریلوی ڈالر جو جمعہ کو 0.7106 ڈالر پر مستحکم رہا، ماہانہ بنیادوں پر تقریباً 2 فیصد اضافے کی جانب گامزن تھا۔

برطانوی پاؤنڈ 1.3484 ڈالر پر مستحکم رہا، لیکن فروری میں 1.5 فیصد کی گراوٹ کے ساتھ اس کے مسلسل 3 مہینوں سے جاری اضافے کا سلسلہ ٹوٹنے والا ہے۔

بینک آف انگلینڈ کے نرم رویے نے برطانوی پاؤنڈ کی قدر کو متاثر کیا اور اب سرمایہ کار مارچ میں شرح سود میں کمی کے 83 فیصد امکانات کو مدنظر رکھ کر سودے کر رہے ہیں۔

دوسری جانب امریکی ڈالر رواں ماہ 0.6 فیصد اضافے کی جانب گامزن ہے، جسے فیڈرل ریزرو کے قدرے سخت موقف سے مدد ملی ہے۔

جنوری کے پالیسی اجلاس میں ’کئی‘ پالیسی سازوں نے اشارہ دیا تھا کہ اگر مہنگائی کی شرح بلند رہی تو وہ شرح سود میں اضافے کے لیے تیار ہیں، اس کے باوجود سرمایہ کار اب بھی اس سال فیڈرل ریزرو کی جانب سے مزید دو کٹوتیوں کی توقع کر رہے ہیں۔

جمعہ کو تیل کی قیمتوں میں ایک ڈالر سے زیادہ اضافہ ہوا، کیونکہ تاجروں نے امریکہ اور ایران کے درمیان جوہری مذاکرات میں توسیع کے بعد ممکنہ سپلائی میں خلل کے خدشات کو مدنظر رکھا۔

برینٹ کرُوڈ فیوچرز 1.38 ڈالر، یا 1.95 فیصد کے اضافے کے ساتھ 72.13 ڈالر فی بیرل تک پہنچ گئیں ( عالمی معیاری وقت 11 بج کر 10 منٹ تک)۔

امریکی ویسٹ ٹیکساس انٹرمیڈیٹ کرُوڈ 1.40 ڈالر، یا 2.15 فیصد کے اضافے کے ساتھ 66.61 ڈالر فی بیرل پر بند ہوئی۔

انٹر بینک مارکیٹ میں ڈالر کی شرحیں (جمعہ)

قیمت خرید: 279.47 روپے

قیمت فروخت: 279.67 روپے