بی این پی انتخابات میں کامیابی کے بعد پاکستان کے ساتھ مضبوط معاشی تعلقات کو فروغ دینے کی خواہاں

بنگلا دیش نیشنلسٹ پارٹی (بی این پی) نے ہفتے کے روز پاکستان کے ساتھ اقتصادی اور تعمیری تعلقات مضبوط کرنے کی خواہش کا اظہار کیا اور اپنی انتخابی جیت کے بعد صدر آصف علی زرداری اور وزیراعظم شہباز شریف کی طرف سے موصول ہونے والی مبارکباد کے پیغامات پر ان کا شکریہ ادا کیا ہے۔

بی این پی نے اپنے ایکس اکاؤنٹ پر کہا ہے کہ ” بنگلہ دیش اور پاکستان کا تاریخی رشتہ چیلنجز اور تعاون دونوں سے عبارت رہا ہے، تاہم ہمارے عوام نے مکالمے، احترام اور علاقائی روابط کی قدر برقرار رکھی ہے۔ ہمیں امید ہے کہ آنے والے سالوں میں ہمارے دونوں ممالک تعمیری تعلقات کو مزید مضبوط کریں گے، اقتصادی اور عوامی روابط کو فروغ دیں گے اور جنوبی ایشیا کے لیے زیادہ پرامن اور خوشحال مستقبل کے لیے مشترکہ کام کریں گے۔“

بی این پی نے مزید کہا کہ بنگلہ دیش دو طرفہ تعلقات میں حالیہ مثبت پیش رفت کا اعتراف کرتا ہے اور پاکستان کے ساتھ باہمی احترام، خودمختار مساوات اور تعمیری مکالمے کی بنیاد پر مستقبل پر مرکوز تعلقات کو فروغ دینے کے لیے تیار ہے۔

اس نے کہا کہ ” ہم ایسے عملی تعاون کے مواقع تلاش کرنے کے منتظر ہیں جو جنوبی ایشیا میں علاقائی امن، استحکام اور مشترکہ ترقی میں حصہ ڈالیں۔“

صدر آصف زرداری نے بی این پی کی شاندار کامیابی پر طارق رحمن کو مبارکباد دی اور بنگلہ دیش کے عوام کو ان کے کامیاب اور پرامن انتخابات پر خراجِ تحسین پیش کیا ہے۔

اپنے ایکس ہینڈل پر وزیراعظم شہباز نے بنگلہ دیش کے عوام کو انتخابات کی کامیاب اور پرامن انعقاد پر بھی مبارکباد دی۔

وزیراعظم نے کہا کہ وہ بنگلہ دیش کی نئی قیادت کے ساتھ قریبی تعاون کے منتظر ہیں تاکہ تاریخی، بھائی چارے پر مبنی کثیرالجہتی دوطرفہ تعلقات کو مزید مضبوط کیا جا سکے اور جنوبی ایشیا اور دیگر خطوں میں امن، استحکام اور ترقی کے مشترکہ اہداف کو آگے بڑھایا جا سکے۔