صنعتی شعبے پر کراس سبسڈی کا بوجھ کم ہوا، پاور ڈویژن

پاور ڈویژن نے بدھ کے روز بتایا کہ صنعتی شعبے پر عائد کراس سبسڈی بوجھ مارچ 2024 میں 225 ارب روپے (فی یونٹ 8.9 روپے) سے کم ہو کر اب 102 ارب روپے (فی یونٹ 4.02 روپے) تک پہنچ گیا ہے، یعنی مجموعی طور پر 123 ارب روپے کی نمایاں کمی ہوئی ہے۔

صنعتی ٹیرف (ٹیکس سمیت) مارچ 2024 میں 62.99 روپے فی یونٹ سے کم ہو کر دسمبر 2025 میں 46.31 روپے فی یونٹ ہوگیا، جبکہ قومی اوسط ٹیرف 53.04 روپے سے کم ہو کر 42.27 روپے فی یونٹ ہو گئی۔

سابق وزیر تجارت گوہر اعجاز نے کہا تھا کہ پاکستان کا صنعتی شعبہ غیر منصفانہ بجلی قیمتوں کی پالیسی کی وجہ سے شدید دباؤ میں ہے، جہاں صنعت کو حکومت کی ناکامیوں کی سبسڈی دینی پڑتی ہے، جس سے صنعتی مسابقت متاثر ہوتی ہے۔

ٹیکسٹائل شعبے کے ایک صنعتکار عامر شیخ نے بتایا کہ بی 3 ٹیرف 33.26 روپے فی یونٹ تھی، جس میں فیول چارج 9.07 روپے تھا، اب یہ 33.26 روپے فی یونٹ ہے، جس میں فیول چارج 7.74 روپے فی یونٹ ہے۔ اس کا مطلب ہے کہ متغیر چارج بڑھ گیا ہے اور ایف پی اے کے تحت فیول کا حساب اصل کے مطابق ہوگا، جس سے عملی طور پر ٹیرف 1.34 روپے فی یونٹ بڑھ گیا ہے۔

پاور ڈویژن کے مطابق، ٹیرف کم کرنے کے لیے حکومت نے غیر مؤثر پاور پلانٹس بند کیے اور پاور پروڈیوسرز کے ساتھ دوبارہ معاہدے کیے۔ صنعتی اور زرعی صارفین کے لیے سرپلس پاور پیکیج کے تحت تین سال کے لیے فی یونٹ 22.98 روپے کی کم قیمت پر اضافی بجلی دستیاب ہوگی، جس سے صنعتی ٹیرف مزید کم ہوگی۔

حکومت نے سرکلر ڈیبٹ مینجمنٹ پلان بھی شروع کیا ہے تاکہ 5 سے 6 سال میں بقایا جات ختم کیے جا سکیں، جس سے موجودہ 3.23 روپے فی یونٹ کا ڈیبٹ سرچارج ختم ہو جائے گا۔

پاور ڈویژن نے مزید کہا کہ حکومت صنعتی صارفین پر کراس سبسڈی کے بوجھ کو مزید کم کرنے کے لیے سبسڈی اصلاحات اور قرض کی ری فنانسنگ سمیت دیگر اقدامات پر غور کر رہی ہے۔

کاپی رائٹ بزنس ریکارڈر، 2026