سندھ میں اساتذہ کے ٹرانسفر کو ڈیجیٹلائز کرنے کے لیے ای ٹرانسفر سسٹم کا آغاز

سندھ کے محکمۂ تعلیم نے اساتذہ اور ملازمین کے تبادلوں کے لیے ای ٹرانسفر سسٹم کا آغاز کر دیا ہے۔ یہ بات محکمۂ تعلیم سندھ نے بدھ کے روزبتائی ہے۔

ای ٹرانسفر سسٹم 15 جنوری سے باضابطہ طور پر فعال ہو جائے گا اور موثر نتائج کے حصول کے لیے اسے مرحلہ وار توسیع دی جائے گی۔

محکمۂ اسکول ایجوکیشن کو ڈیجیٹل بنانے کے عمل کے تحت ای ٹرانسفر سسٹم کی صوبائی کابینہ نے منظوری دی ہے۔

پہلے مرحلے میں یہ نظام اساتذہ کے لیے متعارف کرایا گیا ہے، جس کے بعد اسے محکمۂ تعلیم کے تمام ملازمین تک توسیع دی جائے گی۔

اب اساتذہ اپنے تبادلے کی درخواستیں آن لائن جمع کرا سکیں گے اور گھر بیٹھے اپنی درخواستوں کی صورتحال بھی دیکھ سکیں گے۔

صوبائی وزیر تعلیم سید سردار علی شاہ نے کہا ہے کہ تبادلے کے نظام کو آن لائن کرنے سے شفافیت اور میرٹ کو فروغ ملے گا۔

صوبائی وزیر تعلیم کی ہدایات پر محکمۂ تعلیم سندھ نے روایتی تبادلہ نظام کو ڈیجیٹل عمل سے تبدیل کر دیا ہے۔

اس اقدام سے وقت کی بچت، اخراجات میں کمی اور غیر ضروری انتظامی رکاوٹوں کے خاتمے کی توقع ہے۔

اس وقت محکمۂ اسکول ایجوکیشن سندھ میں مجموعی طور پر 133,547 اساتذہ خدمات انجام دے رہے ہیں، جن میں 105,258 پرائمری اسکول اساتذہ اور 28,289 جونیئر ایلیمنٹری اسکول اساتذہ شامل ہیں۔

صوبائی وزیر تعلیم نے کہا ہے کہ تعلیمی شعبے میں جدید ٹیکنالوجی کے استعمال سے انتظامی کارکردگی اور شفافیت میں مزید بہتری آئے گی۔

انہوں نے مزید کہا کہ ای ٹرانسفر سسٹم اساتذہ کے تبادلوں میں اقربا پروری اور تاخیر کے خاتمے میں موثر ثابت ہوگا۔