نجکاری کمیٹی نے پی آئی اے کی 135 ارب روپے کی بولی کی منظوری دیدی

کابینہ کی نجکاری کمیٹی(سی سی او پی) کے اجلاس کی صدارت نائب وزیراعظم اور وزیر خارجہ سینیٹر محمد اسحاق ڈار نے کی، جس میں پی آئی اے کے 75 فیصد شیئرز کے لیے عارف حبیب گروپ کی قیادت میں کنسورشیم کی 135 ارب روپے کی بولی کی منظوری دی گئی اور کابینہ سے اس کی منظوری کی سفارش کی گئی ہے۔

یہ پیش رفت اس کے بعد سامنے آئی ہے جب گزشتہ ہفتے عارف حبیب گروپ کی قیادت میں کنسورشیم پی آئی اے میں 75 فیصد حصص کی خریداری کے لیے کامیاب بولی دہندہ قرار پایا، جس نے حکومت کی حوالہ جاتی قیمت سے 35 فیصد زیادہ یعنی 135 ارب روپے کی سب سے زیادہ بولی دی اورآئندہ پانچ سال میں اضافی 80 ارب روپے کی سرمایہ کاری کرنے کا عہد کیا۔

نجکاری سے متعلق وزیراعظم کے مشیر محمد علی نے اسلام آباد کے ایک مقامی ہوٹل میں پی آئی اے ہولڈنگ کمپنی لمیٹڈ ( پی آئی اے سی ایل) کے 75 فیصد حصص کی بولی کے عمل کی صدارت کی تھی۔

اجلاس کے دوران نجکاری کی وزارت کے سیکریٹری نے پاکستان انٹرنیشنل ایئر لائن ہولڈنگ کمپنی لمیٹڈ ( پی آئی اے سی ایل ) کی نجکاری کے آئندہ لائحہ عمل پر تفصیلی بریفنگ دی، جس کا اعلان نائب وزیراعظم کے دفتر نے ایک جاری کردہ بیان میں کیا ہے۔

نائب وزیراعظم نے تمام متعلقہ حکام سے کہا کہ وہ نجکاری کے عمل کو جلد حتمی شکل دینے کے لیے بروقت اقدامات کریں، اس امید اور خواہش کے ساتھ کہ اس سے پی آئی اے دوبارہ اپنی سنہرے دنوں کی بحالی حاصل کرے گی۔

اجلاس میں وزیر توانائی، وزیراعظم کے مشیران برائے نجکاری، صنعت و پیداوار، وزیراعظم کے خصوصی معاونین طارق باجوہ اور بلال کیانی، کابینہ کے وفاقی سیکریٹریز، نجکاری کمیشن، دفاع، قانون، توانائی، صنعت اور دیگر متعلقہ محکموں کے سینئر افسران نے شرکت کی۔

پی آئی اے کے سابق ملازمین کا حکومت سے اظہار تشکر

دریں اثنا، پاکستان انٹرنیشنل ایئر لائنز ریٹائرڈ ایمپلائز ایسوسی ایشن ( پی آئی اے آر ای اے) نے پی آئی اے کی نجکاری کے بعد پنشن، مراعات اور دیگر تمام فوائد کے تسلسل پر حکومت کا شکریہ ادا کیا ہے۔

یہ ایسوسی ایشن اپنے 16 ویں سالانہ اجلاس میں اپنے چیئرمین سید طاہر حسن کی صدارت میں اپنے خیالات کا اظہار کر رہی تھی۔ اجلاس میں بڑی تعداد میں پی آئی اے کے ریٹائرڈ ملازمین نے شرکت کی، جس کا حوالہ سرکاری خبررساں ادارے اے پی پی کے منگل کے پریس ریلیز میں دیا گیا ہے۔

پی آئی اے آر ای اے کے عہدیداروں نے کہا ہے کہ حکومت نے نجکاری کے بعد ریٹائرڈ ملازمین کے لیے پنشن، طبی سہولتوں اور رعایتی سفری ٹکٹ جاری رکھنے کی یقین دہانی کرائی ہے۔

انہوں نے خاص طور پر وزیراعظم، نجکاری کمیشن کے چیئرمین محمد علی، پی آئی اے ایچ سی ایل کے چیئرمین طارق باجوہ اور دیگر کے تعاون کو سراہا۔

یقین دہانی کا خیرمقدم کرتے ہوئے شرکاء نے اس فیصلے کو ریٹائرڈ پی آئی اے ملازمین کی فلاح و بہبود کے تحفظ کے لیے ایک اہم قدم قرار دیا۔