بلوچستان کی معدنیات، پانچ بڑے کاروباری گروپس کے سرمایہ کاری منصوبوں کا اعلان

پاکستان کے پانچ بڑے کاروباری گروپس، لیک سٹی ہولڈنگز، فاطمہ گروپ، دین گروپ، ہلٹن گروپ اور سورتی گروپ نے بلوچستان میں اربوں ڈالر کی سرمایہ کاری کا اعلان کیا ہے۔ ان کاروباری گروپس کی مجموعی مارکیٹ ویلیو 5 ارب ڈالر بتائی جاتی ہے۔

یہ پیش رفت اس انکشاف کے بعد سامنے آئی ہے کہ ماری انرجیز لمیٹڈ نے بتایا ہے کہ اس کی مکمل ملکیتی ذیلی کمپنی ماری منرلز (پرائیویٹ) لمیٹڈ نے صوبے میں معدنیات کی تلاش کے لیے گلوبا کور منرلز لمیٹڈ کے ساتھ جوائنٹ وینچر معاہدہ کیا ہے۔

حال ہی میں منعقدہ ایک تقریب سے خطاب کرتے ہوئے سابق وفاقی وزیر اور معروف کاروباری شخصیت گوہر اعجاز نے کہا کہ معدنی ترقی کے آغاز کے ساتھ ہی ملک میں امن اور ترقی کا ایک نیا دور شروع ہوگا جس سے روزگار کے مواقع پیدا ہوں گے۔

ماری، ماری انرجیز کی ملکیتی کمپنی ہے، جبکہ گلوبا کور لمیٹڈ کو بلوچستان میں سونے اور تانبے کے ذخائر کی تلاش کا وسیع تجربہ اور مہارت حاصل ہے۔ معاہدے کے تحت چاغی میں قیمتی معدنیات کی تلاش میں سرمایہ کاری کی جائے گی۔

گوہر اعجاز نے کہا کہ بلوچستان معدنی وسائل سے مالا مال صوبہ ہے اور مقامی پاکستانی کمپنیاں یہاں سرمایہ کاری کر رہی ہیں، جس سے ترقی اور خوشحالی کا نیا دور آئے گا۔