آئی سی سی نے T20 ورلڈ کپ 2026 کے شیڈول کا اعلان کر دیا، پاک بھارت ٹاکرا 15 فروری کو ہوگا

آئی سی سی نے منگل کو ٹی20 ورلڈ کپ 2026 کا شیڈول جاری کر دیا، جس کی بھارت اور سری لنکا 7 فروری سے 8 مارچ تک مشترکہ میزبانی کریں گے۔ اعلان ممبئی میں منعقدہ تقریب کے دوران کیا گیا۔

آئی سی سی کے مطابق میچ سات مقامات پر کھیلے جائیں گے، چنئی، نئی دہلی، کولکتہ، ممبئی، احمد آباد، کولمبو اور کینڈی۔

ٹورنامنٹ میں 20 ٹیمیں حصہ لیں گی جنہیں چار گروپس میں تقسیم کیا جائے گا، اور ہر گروپ کی سرفہرست دو ٹیمیں سپر 8 مرحلے میں پہنچیں گی۔ سپر 8 کی ٹیموں کو دو گروپس میں تقسیم کیا جائے گا اور ہر گروپ کی دو بہترین ٹیمیں سیمی فائنل میں جگہ بنائیں گی۔

گروپ اے میں بھارت، پاکستان، امریکہ، ہالینڈ اور نمیبیا
گروپ بی میں آسٹریلیا، سری لنکا، آئرلینڈ، زمبابوے اور عمان
گروپ سی میں انگلینڈ، ویسٹ انڈیز، بنگلہ دیش، نیپال اور اٹلی
گروپ ڈی میں نیوزی لینڈ، جنوبی افریقہ، افغانستان، کینیڈا اور متحدہ عرب امارات شامل ہیں۔

پاکستان کے میچز
پاکستان اپنا پہلا میچ 7 فروری کو ہالینڈ کے خلاف کھیلے گا۔ دوسرا میچ 10 فروری کو کولمبو میں امریکہ کے خلاف شیڈول ہے۔ پاکستان اور بھارت کا انتہائی اہم میچ 15 فروری کو کولمبو میں ہی ہوگا۔ پاکستان اپنا آخری گروپ میچ 18 فروری کو نمیبیا کے خلاف کھیلے گا۔

سپر 8 مرحلہ
سپر 8 مرحلہ 21 فروری سے یکم مارچ تک جاری رہے گا۔ پہلا سیمی فائنل 4 مارچ کو کولکتہ میں ہوگا، جبکہ دوسرا سیمی فائنل 5 مارچ کو ممبئی میں کھیلا جائے گا۔ تاہم اگر پاکستان کوالیفائی کرتا ہے تو اس کا سیمی فائنل کولمبو منتقل کر دیا جائے گا۔

فائنل
فائنل کی میزبانی کے لیے احمد آباد کا انتخاب کیا گیا ہے، لیکن اگر پاکستان فائنل میں پہنچتا ہے تو فیصلہ کن مقابلہ بھی کولمبو منتقل کر دیا جائے گا۔