آزاد کشمیر: انور الحق کے خلاف عدم اعتماد کی تحریک کامیاب، فیصل راٹھور نئے وزیراعظم منتخب

آزاد جموں و کشمیر کے سیاسی منظرنامے میں پیر کو اس وقت تبدیلی آئی جب وزیر اعظم انور الحق کے خلاف اسمبلی میں عدم اعتماد کی تحریک کامیاب ہوئی، جس سے فیصل راٹھور کے نئے وزیر اعظم منتخب ہونے کا راستہ ہموار ہوا۔

اس سیشن کی صدارت اسپیکر چوہدری لطیف اکبر نے کی اور پی پی پی کے رکن اسمبلی چوہدری قاسم مجید نے عدم اعتماد کی قرارداد پیش کی۔ اسمبلی حکام کے مطابق تحریک کے حق میں 36 اور مخالفت میں صرف 2 ووٹ ڈالے گئے۔

کامیاب ووٹنگ کے بعد پی پی پی کے فیصل ممتاز راٹھور آزاد کشمیر کے نئے وزیر اعظم منتخب ہوئے۔

قبل ازیں پی پی پی نے اس عہدے کے لیے اپنا امیدوار فیصل راٹھور نامزد کیا تھا۔

گزشتہ ماہ، پاکستان مسلم لیگ نواز (پی ایم ایل- این ) اور پی پی پی نے متفقہ طور پر فیصلہ کیا تھا کہ وہ آزاد کشمیر کے وزیر اعظم کے خلاف عدم اعتماد کی تحریک لائیں تاکہ نئی حکومت قائم کی جا سکے۔

میڈیا سے بات کرتے ہوئے پی پی پی کے رہنما قمر زمان کائرہ نے کہا کہ پی پی پی اور پی ایم ایل - این نے متفقہ طور پر آزاد کشمیر کے وزیر اعظم کے خلاف عدم اعتماد کی تحریک لانے اور ایک مضبوط نیا انتظام قائم کرنے کا فیصلہ کیا تاکہ مستقبل میں آزاد، شفاف اور منصفانہ انتخابات ہو سکیں۔

اس کے علاوہ پی ایم ایل -این کے رہنما احسن اقبال نے کہا کہ آزاد کشمیر کی موجودہ حکومت کشمیری عوام کے مسائل حل کرنے میں ناکام رہی ہے اور نئی حکومت بنانے کا فیصلہ صرف اچھی حکمرانی اور عوامی مسائل کے حل کے لیے کیا گیا ہے۔

انہوں نے کہا کہ پی ایم ایل -این پی پی پی کی حکومت بنانے میں حمایت کرے گی اور موجودہ وزیر اعظم کو عدم اعتماد کی تحریک کے ذریعے ہٹانے میں مدد فراہم کرے گی۔

آزاد کشمیر کی قانون ساز اسمبلی میں 52 ارکان ہیں اور سادہ اکثریت حاصل کرنے کے لیے کسی پارٹی کو 27 ارکان کی حمایت درکار ہوتی ہے۔