ڈی آئی خان اور میرپور میں گرین فیلڈ ایئرپورٹس کی تعمیر زیر غور

حکام نے ڈیرہ اسماعیل خان اور میرپور (آزاد جموں و کشمیر) میں گرین فیلڈ ایئرپورٹس کی تعمیر پر غور کیا ہے۔ پاکستان ایوی ایشن اتھارٹی (پی اے اے) کے ترجمان نے بتایا ہے کہ اسٹیک ہولڈرز انگیجمنٹ اینڈ بریفنگ سیشن کے عنوان سے کراچی میں اجلاس منعقد ہوا، جس کا مقصد نئے اور اپ گریڈ شدہ ایئرپورٹس کے ڈھانچے کی ترقی پر مشاورت کرنا تھا۔

فورم میں ڈیرہ غازی خان کے موجودہ ایئرپورٹ کی بہتری کے منصوبے پر بھی تبادلہ خیال کیا گیا۔

اجلاس کی صدارت پی اے اے کے ڈائریکٹر پلاننگ اینڈ ڈویلپمنٹ انجینئر غلام عباس شیخ نے کی جس میں پاکستان انٹرنیشنل ایئرلائنز (پی آئی اے)، ایئرسیال، ایئربلو، سیرین ایئر اور فلائی دبئی کے نمائندوں کے علاوہ پی اے اے کے منصوبے کے ماہر مشیر بھی شریک ہوئے۔

آزاد کشمیر میں حالیہ پرتشدد مظاہروں کے بعد وفاقی حکومت کے نمائندوں اور جوائنٹ عوامی ایکشن کمیٹی (جے اے اے سی) کے درمیان ہونے والے معاہدے میں یہ نکتہ بھی شامل تھا کہ موجودہ مالی سال کے دوران میرپور میں بین الاقوامی ہوائی اڈے کی تعمیر کے منصوبے کا باضابطہ اعلان کیا جا سکتا ہے۔

پی اے اے کے ترجمان کے مطابق اجلاس میں ماہر مشیروں نے شرکا کو تازہ ترین فیزیبلٹی رپورٹ سے آگاہ کیا اور مسافروں کے ممکنہ اعداد و شمار کا تجزیہ پیش کیا۔

دوران اجلاس ایئرلائنز کے نمائندوں نے بتایا کہ مجوزہ علاقوں میں چھوٹے ہوائی اڈوں کی تعمیر سے ابتدائی مرحلے میں بڑے شہروں کے ہوائی اڈوں کے مسافر ٹریفک میں کمی آ سکتی ہے۔

اس موقع پر ایئرلائنز کے نمائندوں نے بتایا کہ تجویز کردہ علاقوں میں چھوٹے ایئرپورٹس کی تعمیر کے بعد ابتدا میں بڑے شہروں کے ایئرپورٹس سے کچھ مسافروں کا رخ تبدیل ہوسکتا ہے۔

پی اے اے کی ٹیم نے اس حوالے سے حکمتِ عملی پر مبنی موقف اختیار کرتے ہوئے کہا کہ علاقائی رابطے کو مضبوط بنانا معاشی ترقی، سیاحت اور رسائی کو فروغ دیتا ہے، جو بالآخر پاکستان کے مجموعی ہوابازی کے نظام کے لیے فائدہ مند ثابت ہوتا ہے۔

ترجمان کے مطابق پی اے اے نے اس عزم کا اعادہ کیا کہ اتھارٹی تمام اسٹیک ہولڈرز اور تکنیکی ماہرین سے مسلسل مشاورت جاری رکھے گی ، تاکہ ایسی قابلِ عمل اور طلب کے مطابق ترقیاتی تجاویز پر عمل کیا جا سکے جو پاکستان کے ہوابازی کے ڈھانچے کی متوازن اور پائیدار ترقی میں معاون ہوں۔