حبکو گرین کی کراچی تا پشاور ای وی چارجنگ نیٹ ورک کی توسیع تیز

حبکو گرین (پرائیویٹ) لمیٹڈ (ایچ جی ایل) جو حب پاور ہولڈنگز لمیٹڈ (ایچ پی ایچ ایل) کی ذیلی کمپنی ہے، ملک میں برقی گاڑیوں (ای وی) کے چارجنگ انفرااسٹرکچر کے فروغ کے لیے نمایاں اقدامات کر رہی ہے۔

کمپنی نے کراچی سے پشاور تک ڈی سی فاسٹ چارجنگ اسٹیشنز کا نیٹ ورک قائم کرنے کا منصوبہ بنایا ہے، جس کا پہلا مرحلہ حیدرآباد، مورو، سکھر اور ظاہر پیر (نارتھ) پر مشتمل ہے جو 31 اکتوبر 2025 تک مکمل کیا جائے گا۔

حبکو جو پاکستان کی سب سے بڑی آزاد بجلی پیدا کرنے والی کمپنی (آئی پی پی) ہے نے جمعرات کو جاری ہونے والی اپنی تازہ مالیاتی رپورٹ میں یہ منصوبے ظاہر کیے۔

رپورٹ کے مطابق ایچ جی ایل اس وقت کراچی، لاہور اور اسلام آباد میں 10 فعال ڈی سی فاسٹ چارجرز چلا رہی ہے، جب کہ مزید دو چارجنگ اسٹیشنز تکمیل کے آخری مراحل میں ہیں۔

رپورٹ میں کہا گیا کہ ایچ جی ایل کراچی سے پشاور کو جوڑنے کے منصوبے کے پہلے مرحلے کے طور پر ہائی ویز پر چار ای وی چارجنگ اسٹیشنز قائم کرنے کا ہدف رکھتی ہے۔ پہلا مرحلہ حیدرآباد، مورو، سکھر اور ظاہر پیر (نارتھ) پر مشتمل ہے، جس پر کام جاری ہے اور کمیشننگ 31 اکتوبر 2025 تک متوقع ہے۔

کمپنی کے مطابق دوسرا مرحلہ جس میں ملتان سے پشاور تک کا حصہ شامل ہے مالی سال 2025-26 کی تیسری سہ ماہی میں مکمل کیا جائے گا۔

حبکو گرین نے اپنا پہلا ای وی چارجنگ اسٹیشن 21 جنوری 2025 کو کراچی کے اوشن مال میں افتتاح کیا تھا۔ کمپنی کا مقصد پورے ملک میں جدید اور قابل اعتماد ای وی چارجنگ انفرااسٹرکچر قائم کرنا ہے، جس میں موٹرویز، ہائی ویز، بڑے شہر، اعلیٰ درجے کے مالز اور تجارتی مراکز شامل ہیں۔

اس کے بعد فروری 2025 میں حبکو گرین نے پاکستان اسٹیٹ آئل (پی ایس او) کے ساتھ ملک بھر میں پی ایس او کے مقامات پر ای وی چارجنگ انفرااسٹرکچر کی تنصیب کے لیے تعاون کے معاہدے پر دستخط کیے۔

اپریل میں اٹک پٹرولیم لمیٹڈ (اے پی ایل) نے بھی حبکو گرین کے ساتھ شراکت داری کا معاہدہ کیا ، تاکہ ملک کے منتخب اے پی ایل اسٹیشنز پر ای وی چارجنگ انفرااسٹرکچر تیار اور فروغ دیا جا سکے۔

چارجنگ نیٹ ورک سے آگے بڑھتے ہوئے حبکو نے نئی توانائی کی گاڑیوں (این ای وی) کے شعبے میں بھی نمایاں پیش رفت کی ہے۔

اس مقصد کے لیے اس کی ذیلی کمپنی میگا موٹر کمپنی (پرائیویٹ) لمیٹڈ (ایم ایم سی پی ایل) بی وائی ڈی (بی وائی ڈی) کی پاکستان میں باضابطہ پارٹنر ہے۔

رپورٹ کے مطابق فروری 2025 میں بی وائی ڈی گاڑیوں کی فراہمی کے آغاز کے بعد میگا موٹر کمپنی نے جولائی 2025 میں اپنی پہلی پلگ اِن ہائبرڈ الیکٹرک وہیکل (پی ایچ ای وی) بی وائی ڈی شارک 6 متعارف کرائی۔

بی وائی ڈی گاڑیوں کے لیے مارکیٹ کا ردعمل مثبت رہا ہے، جس سے کمپنی کو تیزی سے بڑھتے ہوئے این ای وی شعبے میں مضبوط مقام حاصل ہوا ہے۔

مزید برآں حبکو اپنی ذیلی کمپنی آرک میٹلز (پرائیویٹ) لمیٹڈ کے ذریعے پاکستان میں معدنی وسائل کی تلاش اور ترقی کے مواقع بھی حاصل کر رہی ہے۔

کمپنی نے بتایا کہ آرک میٹلز اس وقت بلوچستان میں امید افزا مواقع کا جائزہ لے رہی ہے۔

رپورٹ کے مطابق حوصلہ افزا ابتدائی نتائج اور نمایاں معدنی وسائل کے پیش نظر حبکو خطے کے غیر استعمال شدہ ذخائر کی نشاندہی، ترقی اور ان سے فائدہ اٹھانے کے لیے پرعزم ہے۔