ماؤنٹ ایورسٹ کے نیپالی و چینی حصے سیاحوں کے لیے بند

ماؤنٹ ایورسٹ کے نیپالی اور چینی حصوں کو بدھ کے روز سیاحوں کے لیے بند کر دیا گیا، کیونکہ غیر متوقع طور پر ہونے والی شدید برف باری کے باعث راستے آمدورفت کے قابل نہیں رہے۔ برف میں پھنسے ٹریکرز کو بچانے کی کوشش کے دوران ایک ہیلی کاپٹر بھی حادثے کا شکار ہوگیا۔

پیر سے علاقے میں برف باری جاری ہے، جو خلیج بنگال سے آنے والے سمندری طوفان کے نتیجے میں ہوئی۔ یہ اس ماہ ہمالیہ میں ہونے والی دوسری شدید برف باری ہے۔

نیپالی حکام نے اناپورنا، مناسلو اور دھاولگیری کے پہاڑی راستوں پر سفر روکنے کی ہدایت دی ہے، جہاں دنیا کی بلند ترین چوٹیوں میں سے کئی واقع ہیں۔

نیپال کی سول ایوی ایشن اتھارٹی کے مطابق ایک نجی ہیلی کاپٹر، جو ایورسٹ بیس کیمپ کے قریب لوبوچے علاقے میں پھنسے سیاحوں کو بچانے جا رہا تھا، اترتے وقت برف پر پھسل گیا اور الٹ گیا۔

ویڈیو فوٹیج میں ہیلی کاپٹر کو ایک طرف گرا ہوا دکھایا گیا۔ پائلٹ زندہ بچ گیا اور بعد میں ریسکیو کر لیا گیا، تاہم یہ واضح نہیں کہ پھنسے ہوئے ٹریکرز کو بچایا جا سکا یا نہیں۔

موسمی ماہرین نے جمعرات اور جمعہ کو مزید شدید بارش اور برف باری کی پیش گوئی کی ہے کیونکہ سمندری طوفان ’’مونتھا‘‘ بھارت کے مشرقی ساحل سے گزر رہا ہے۔

دوسری جانب تبت کے علاقے میں منگل کی دوپہر سے ہی ٹکٹوں کی فروخت معطل کر دی گئی ہے کیونکہ برف اور دھند کے باعث سڑکیں برفانی اور خطرناک ہو گئی ہیں۔ حکام کے مطابق علاقے میں درجہ حرارت منفی میں گر چکا ہے۔

گزشتہ ماہ بھی شدید برف باری کے باعث سینکڑوں سیاح ایورسٹ کے تبت والے حصے میں پھنس گئے تھے جنہیں کئی روز کی ریسکیو کارروائی کے بعد بحفاظت نکالا گیاتھا۔