راولپنڈی میں 15 اکتوبر سے نئی الیکٹرک بس سروس، 20روپے کرایہ ،طلباء اور بزرگ شہریوں کیلئے مفت سفری سہولت

وزیراعلیٰ پنجاب مریم نواز شریف 15 اکتوبر کو راولپنڈی کے شہریوں کے لیے جدید، آرام دہ اور سستی سفری سہولتوں پر مشتمل چین میں تیار کی گئی نئی الیکٹرک بس سروس کا افتتاح کریں گی۔ یہ اقدام صوبے کی جدیدیت کی مہم کے تحت پاکستان میں ماحول دوست شہری ٹرانسپورٹ کی جانب ایک اہم پیش رفت ہے۔

اس منصوبے کے تحت راولپنڈی شہر اور کینٹ کے لیے مرحلہ وار 87 نئی ایئرکنڈیشنڈ بسیں فراہم کی جائیں گی ، پہلے مرحلے میں روات سے موٹر وے چوک سمیت 4 مختلف روٹس پر بس سروس کا آغاز کیا جائے گا ۔ بسوں کا کرایہ صرف 20 روپے مقرر کیا گیا ہے جبکہ 60 سال سے زائد عمر کے شہریوں اور طلباء کے لیے سفر بالکل مفت ہوگا۔

یہ سروس شہریوں کو باوقار، معیاری اور قابلِ اعتماد سفری سہولت فراہم کرے گی، جس سے ٹریفک کے دباؤ میں بھی کمی آئے گی۔

پارلیمنٹ ہاؤس کے باہر میڈیا سے گفتگو کرتے ہوئے پاکستان مسلم لیگ (ن) راولپنڈی ڈویژن کے صدر ملک ابرار احمد نے کہا کہ بس سروس کا آغاز عوامی فلاح کا منہ بولتا ثبوت ہے، جس سے شہریوں کے روزمرہ سفر کے مسائل کم ہوں گے اور جدید سفری سہولتیں ہر طبقے تک پہنچیں گی۔

یہ منصوبہ پنجاب کے گرین ڈیولپمنٹ اہداف کے مطابق ٹریفک کے دباؤ اور آلودگی میں کمی میں مدد دے گا۔

ملک ابرار احمد نے کہا کہ وزیراعلیٰ مریم نواز شریف نے پنجاب میں حکومت سنبھالتے ہی گورننس، شفافیت اور عوامی خدمت کے شعبوں میں نئی مثالیں قائم کی ہیں۔ تعلیم، صحت، ٹرانسپورٹ، روزگار، انفراسٹرکچر اور سوشل ویلفیئر کے میدان میں ان کی قیادت میں متعدد منصوبے ریکارڈ مدت میں مکمل یا آغاز کے مراحل میں ہیں۔اسکول ری ویمپنگ پروگرام کے تحت سرکاری سکولوں میں جدید سہولیات کی فراہمی، ماں اور بچہ اسپتالوں کے قیام، پنجاب گرین ٹریکٹر اسکیم، سستا آٹا و اشیائے خوردونوش سکیم اور ڈیجیٹل گورننس جیسے اقدامات عوامی سطح پر بے حد پذیرائی حاصل کر چکے ہیں،ان تمام منصوبوں کا مقصد صرف موجودہ چیلنجز کا حل نہیں بلکہ پنجاب کو ایک جدید، خوشحال اور فلاحی صوبے کے طور پر ترقی دینا ہے۔

کاپی رائٹ بزنس ریکارڈر 2025