بلوچستان، بھارتی پراکسی کے 5 دہشتگرد ہلاک کردئیے، آئی ایس پی آر

بلوچستان کے ضلع خضدار میں ایک انٹیلی جنس کی بنیاد پر کیے گئے آپریشن (آئی بی او) میں سیکیورٹی فورسز نے بھارتی پراکسی فتنہ الخوارج سے تعلق رکھنے والے پانچ دہشت گردوں کو ہلاک کر دیا۔

آئی ایس پی آر کے مطابق، آپریشن کے دوران سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا۔

ترجمان کے مطابق ہلاک دہشت گردوں سے اسلحہ، گولہ بارود اور دھماکہ خیز مواد بھی برآمد ہوا ہے۔ یہ دہشت گرد علاقے میں متعدد دہشت گردانہ سرگرمیوں میں ملوث رہے ہیں۔

مزید بتایا گیا کہ علاقے میں کلیئرنس آپریشن جاری ہے تاکہ باقی ماندہ دہشت گردوں کو بھی ختم کیا جا سکے، کیونکہ پاکستان کی سیکیورٹی فورسز ملک سے بھارتی سرپرستی میں ہونے والی دہشت گردی کے ناسور کو جڑ سے اکھاڑنے کے لیے پرعزم ہیں۔

خیال رہے کہ 12 ستمبر کو بھی بلوچستان کے ضلع مستونگ میں ایک اور انٹیلی جنس بیسڈ آپریشن کے دوران سیکیورٹی فورسز نے چار دہشت گردوں کو ہلاک کیا تھا۔

آئی ایس پی آر کے مطابق وہ دہشت گرد علاقے میں متعدد حملوں میں ملوث تھے۔

گزشتہ ماہ آئی ایس پی آر کے ڈائریکٹر جنرل لیفٹیننٹ جنرل احمد شریف چوہدری نے بلوچستان کے عوام سے اپیل کی تھی کہ وہ دہشت گردوں اور ان کے سہولت کاروں کو بے نقاب کریں، اور اس حوالے سے سیکیورٹی فورسز، عوام اور صوبائی انتظامیہ کو ایک ساتھ کام کرنا ہوگا۔

ڈی جی آئی ایس پی آر نے یہ بھی انتباہ دیا تھا کہ جو شہری دہشت گردوں کو پناہ دیں گے یا اپنے گھروں میں دھماکہ خیز مواد چھپائیں گے، انہیں نتائج کا سامنا کرنا پڑے گا۔

انہوں نے کہا تھا کہ ہمیں یقین دلایا جا رہا ہے کہ بلوچستان کے عوام اور نوجوانوں کے ذہنوں میں پاکستان کے خلاف کچھ نہ کچھ تیار کیا جا رہا ہے۔