ڈالر کے مقابلے میں روپیہ مسلسل 28 ویں روز بھی مستحکم، قدر میں اضافہ ریکارڈ

انٹر بینک مارکیٹ میں منگل کے روز امریکی ڈالر کے مقابلے میں پاکستانی روپیہ اپنی مثبت رفتار برقرار رکھتے ہوئے معمولی قدرے مستحکم ہوا۔

کاروبار کے اختتام پر روپیہ ڈالر کے مقابلے میں ایک پیسے کے اضافے کے ساتھ 281.51 روپے پر بند ہوا۔ یہ روپے کی امریکی کرنسی کے خلاف مسلسل 28ویں روز کی بہتری ہے۔

یاد رہے کہ پیر کو مقامی کرنسی 281.52 روپے پر بند ہوئی تھی۔

عالمی سطح پر منگل کو امریکی ڈالر یورو کے مقابلے میں ڈھائی ماہ کی کم ترین سطح کے قریب اور آسٹریلین ڈالر (جو خطرے کے ساتھ جڑا ہوا سمجھا جاتا ہے) کے مقابلے میں دس ماہ کی کم ترین سطح کے قریب ٹریڈ ہوا کیونکہ سرمایہ کار رواں ہفتے فیڈرل ریزرو کی شرح سود میں کمی اور اس کے بعد مزید کٹوتیوں کی توقعات کو یقینی بنارہے ہیں۔

امریکی ڈالر برطانوی پاؤنڈ کے مقابلے میں بھی دو ماہ سے زائد کی کم ترین سطح کے قریب رہا جبکہ امریکی صدر ڈونلڈ ٹرمپ نے ایک بار پھر جارحانہ مالیاتی نرمی کا مطالبہ دہرایا۔

مارکیٹس بدھ کو کم از کم 25 بیسس پوائنٹس کی شرح سود میں کمی کو یقینی سمجھ رہی ہیں جبکہ 50 بیسس پوائنٹس کی بڑی کمی کے امکانات بھی موجود ہیں۔

اس سال کے بقیہ عرصے میں مجموعی طور پر 67 بیسس پوائنٹس کی کمی متوقع ہے جو جنوری کے اختتام تک بڑھ کر 81 بیسس پوائنٹس تک پہنچ سکتی ہے۔

صدر ٹرمپ نے پیر کو ایک سوشل میڈیا پوسٹ میں چیئرمین پاول پر زور دیا کہ ہاؤسنگ مارکیٹ کی صورتحال کو مدنظر رکھتے ہوئے بینچ مارک شرح سود میں مزید بڑی کمی کی جائے۔

حالیہ ہفتوں میں تیزی سے کمزور ہوتے لیبر مارکیٹ کے اعدادوشمار شرح سود میں کمی کی توقعات میں اضافے کے اہم محرک ثابت ہوئے ہیں جس کے نتیجے میں ڈالر اور بانڈ ییلڈز نیچے آئے ہیں جبکہ ایکویٹی کی قیمتوں میں اضافہ ہوا ہے اور پیر کو وال اسٹریٹ نے نئی بلندیاں حاصل کیں۔

تیل کی قیمتیں، جو زرِمبادلہ کی برابری کا ایک اہم اشارہ ہیں، منگل کے روز مستحکم رہیں کیونکہ مارکیٹیں یوکرینی ڈرون حملوں کے بعد روس کی ریفائنریوں میں ممکنہ سپلائی تعطل اور امریکی مرکزی بینک کی جانب سے شرح سود میں کٹوتی کے امکانات کا جائزہ لیتے رہیں۔

برینٹ کروڈ فیوچرز 20 سینٹ یا 0.3 فیصد کمی کے ساتھ 67.24 ڈالر فی بیرل پر آگئے جبکہ امریکی ویسٹ ٹیکساس انٹرمیڈیٹ (ڈبلیو ٹی آئی ) 19 سینٹ یا 0.3 فیصد گر کر 63.11 ڈالر فی بیرل پر رہا۔

پیر کو برینٹ 45 سینٹ اضافے کے ساتھ 67.44 ڈالر جبکہ ڈبلیو ٹی آئی 61 سینٹ بڑھ کر 63.30 ڈالر فی بیرل پر بند ہوا تھا۔