قطر پر بلا اشتعال جارحیت، پاکستان کا اقوام متحدہ سے اسرائیل کوجوابدہ ٹھہرانے کا مطالبہ

پاکستان نے جمعرات کے روز اقوام متحدہ کی سلامتی کونسل (یو این ایس سی) سے مطالبہ کیا کہ وہ محض اسرائیلی حملوں کی مذمت پر اکتفا نہ کرے جو حماس کے مذاکرات کاروں کو نشانہ بنانے کیلئے کئے گئے، بلکہ اسرائیل کو قطر کے خلاف اس کی غیر قانونی اور بلا اشتعال جارحیت پر جوابدہ ٹھہرائے۔

مشرقِ وسطیٰ پر ہونے والے ہنگامی اجلاس میں، جو 15 رکنی کونسل نے منعقد کیا، اقوام متحدہ میں پاکستان کے مستقل مندوب سفیر عاصم افتخار احمد نے اس بات پر زور دیا کہ امن کی کوششوں میں شامل ثالثوں کے کردار اور تحفظ کو یقینی بنایا جائے، اور بین الاقوامی قانون اور اقوام متحدہ کے چارٹر کی مرکزیت کو عالمی امن و سلامتی کے قیام میں دوبارہ تسلیم کیا جائے۔

یہ اجلاس پاکستان، الجزائر اور صومالیہ کی درخواست پر منعقد ہوا، جس کی صدارت ستمبر کے لیے کونسل کے صدر جنوبی کوریا نے کی۔

پاکستانی مندوب نے کہا کہ پاکستان برادر ملک قطر کے خلاف غیر قانونی اور بلا اشتعال اسرائیلی جارحیت کی سخت ترین الفاظ میں مذمت کرتا ہے، اسے قطر کی خودمختاری اور علاقائی سالمیت پر بے پروا اور اشتعال انگیز حملہ قرار دیتا ہے۔

انہوں نے نشاندہی کی کہ اسرائیلی حملے رہائشی علاقے پر کیے گئے جس سے جان بوجھ کر شہریوں کو خطرے میں ڈالا گیا، جو بین الاقوامی انسانی قانون کی سنگین خلاف ورزی ہے۔ انہوں نے کہا کہ یہ کھلم کھلا اور غیر قانونی جارحیت کوئی الگ واقعہ نہیں بلکہ اسرائیل کی جارحیت اور بین الاقوامی قوانین کی مسلسل خلاف ورزیوں کے وسیع تر سلسلے کا حصہ ہے جو خطے کے امن و استحکام کو کمزور کرتا ہے۔

انہوں نے کہا کہ پاکستان، قطر کی حکومت اور عوام کے ساتھ مکمل یکجہتی کا اظہار کرتا ہے اور ان کے اس ناقابلِ تنسیخ حق کی بھرپور حمایت کرتا ہے کہ وہ اپنی خودمختاری، علاقائی سالمیت اور اپنی سرزمین پر موجود تمام افراد کے تحفظ کے لیے اقوام متحدہ کے چارٹر کے مطابق تمام ضروری اقدامات کریں۔

انہوں نے مزید بتایا کہ وزیرِاعظم محمد شہباز شریف، نائب وزیراعظم/وزیرِ خارجہ اسحاق ڈار سمیت ایک اعلیٰ سطح وفد کے ہمراہ آج قطر کے دورے پر ہیں۔ یہ دورہ قطر کی سلامتی اور خودمختاری کے لیے پاکستان کی غیر متزلزل حمایت اور مشرقِ وسطیٰ میں امن و استحکام کے عزم کا مظہر ہے۔

انہوں نے زور دے کر کہا کہ اسرائیل کی یہ غیر ذمہ دارانہ کارروائی اس کے بین الاقوامی قوانین کی منظم خلاف ورزی اور خطے کو عدم استحکام کا شکار کرنے کی پالیسی کا ایک اور مظہر ہے۔ یہ جارحیت کے ایسے اقدامات میں اضافہ ہے جو غزہ میں فوجی کارروائیوں، شام، لبنان، ایران اور یمن میں بار بار کی جانے والی سرحد پار بمباریوں کے ذریعے اقوام متحدہ کے چارٹر اور انسانی قوانین کی خلاف ورزی کرتے ہیں۔

انہوں نے کہا کہ ایسی جارحیت، جیسا کہ اقوام متحدہ کی جنرل اسمبلی کی قرارداد 3314 میں بیان کیا گیا ہے، نہ صرف ایک خطرناک نظیر قائم کرتی ہے بلکہ قانون کی حکمرانی کو مجروح کرتی ہے اور استثنیٰ کی ایسی ثقافت کو جنم دیتی ہے جو تمام ریاستوں کی سلامتی کے لیے خطرہ ہے۔