بلوچستان حکومت نے بینک آف بلوچستان کے قیام کا اعلان کردیا۔ وزیر اعلیٰ بلوچستان میر سرفراز بگٹی کی زیر صدارت ایک اہم اجلاس میں بینک آف بلوچستان کے قیام کی ابتدائی فزیبلٹی رپورٹ پیش کی گئی جسے قابلِ عمل قرار دیا گیا۔
وزیر اعلیٰ نے ایک ہفتے کے اندر آپریشنل پلان مرتب کرنے کی ہدایت بھی جاری کی۔اجلاس سے خطاب میں انہوں نے کہا کہ بینک آف بلوچستان کا قیام عوام، تاجروں اور سرمایہ کاروں کو معیاری بینکنگ خدمات فراہم کرے گا۔
انہوں نے مزید کہا کہ صوبے کے عوام جلد خوشخبری سنیں گے کیونکہ یہ منصوبہ خطے میں معاشی سرگرمیوں کو فروغ دینے میں مددگار ثابت ہوگا۔
سرفراز بگٹی نے مزید کہا کہ بینک آف بلوچستان صوبے کی معیشت میں ایک تاریخی سنگ میل ثابت ہوگا۔ اس بینک کے ذریعے نوجوانوں کے لیے روزگار کے نئے مواقع پیدا ہوں گے اور صوبائی وسائل کے استعمال سے ترقیاتی منصوبوں کی رفتار میں تیزی آئے گی۔
اجلاس میں صوبائی وزیر خزانہ میر شعیب نوشیروانی، چیف سیکریٹری بلوچستان شکیل قادر خان، پرنسپل سیکریٹری بابر خان اور دیگر اعلیٰ حکام نے شرکت کی۔ بینکاری شعبے کے ماہرین نے بھی آن لائن شرکت کی اور منصوبے کو تیز رفتاری سے فعال کرنے پر اتفاق کیا۔
Comments
Comments are closed.