اسٹیل ملز کی اراضی پر صنعتی زون کے قیام اور چمڑے کی برآمدات میں آسانی کی منظوری

وفاقی کابینہ کی اقتصادی رابطہ کمیٹی (ای سی سی) نے بدھ کے روز کئی اہم اقتصادی فیصلوں کی منظوری دی ہے، جن میں پاکستان اسٹیل مل کی اراضی پر صنعتی اسٹیٹ کے قیام، چمڑے کی درآمد و برآمد پر ہیلتھ کوارنٹین سرٹیفکیٹ کی شرط ختم کرنے اور ماحولیاتی و میڈیا منصوبوں کے لیے بڑے اضافی مالیاتی گرانٹس شامل ہیں۔

اجلاس کی صدارت وفاقی وزیر خزانہ سینیٹر محمد اورنگزیب نے کی، جس میں وزیر برائے توانائی سردار اویس احمد خان لغاری، وزیر تجارت جام کمال خان، وفاقی سیکریٹریز اور دیگر اعلیٰ حکام شریک ہوئے۔

ای سی سی نے چمڑے کی درآمد و برآمد پر ہیلتھ کوارنٹین سرٹیفکیٹ کی شرط ختم کرنے کی منظوری دے دی۔ اس اقدام کا مقصد چمڑے کی صنعت کو سہولت فراہم کرنا اور عالمی منڈی میں اس کی مسابقت کو بہتر بنانا ہے۔

ای سی سی نے مالی سال 2025-26 کے لیے وزارتِ موسمیاتی تبدیلی و ماحولیاتی ہم آہنگی کے لیے تکنیکی ضمنی گرانٹ کی منظوری بھی دی۔ یہ فنڈز پاکستان کی رواں سال برازیل میں ہونے والی COP-30 کانفرنس میں شرکت کے اخراجات پورے کرنے میں مدد دیں گے، جو ماحولیاتی تحفظ اور موسمیاتی مزاحمت کو مضبوط بنانے کی قومی کوششوں کا حصہ ہے۔

کمیٹی نے پاکستان ٹیلی ویژن کارپوریشن (پی ٹی وی سی) کے لیے 2.829 ارب روپے کی منظوری بھی دی، تاکہ انگریزی نیوز چینل کو جدید خطوط پر استوار کیا جا سکے، نشریاتی معیار بہتر بنانے اور عالمی سطح پر رسائی بڑھانے کے لیے۔

ای سی سی نے وزارت اطلاعات کو ہدایت دی کہ وہ اس چینل کو خود کفیل بنانے اور وفاقی گرانٹس پر انحصار کم کرنے کے لیے مکمل کاروباری منصوبہ تیار کرے۔

ایک اہم صنعتی پیشرفت کے طور پر اقتصادی رابطہ کمیٹی (ای سی سی) نے کراچی میں پاکستان اسٹیل ملز (پی ایس ایم) کی اراضی پر صنعتی اسٹیٹ کے قیام کی منظوری دے دی ہے۔ اس منصوبے کا مقصد صنعتی سرگرمیوں کو فروغ دینا، روزگار کے مواقع پیدا کرنا اور سرمایہ کاری کو راغب کرنا ہے۔

وزیر خزانہ سینیٹر محمد اورنگزیب نے منظور شدہ اقدامات پر بر وقت عملدرآمد کی ضرورت پر زور دیتے ہوئے کہا کہ اس سے مطلوبہ اقتصادی و سماجی فوائد حاصل کیے جا سکیں گے۔