قومی بچت کی مختلف اسکیموں پر منافع کی شرح میں کمی

ڈائریکٹوریٹ آف نیشنل سیونگز (سی ڈی این ایس) نے قومی بچت کی مختلف اسکیموں پر منافع کی شرح میں کمی کر دی ہے ۔

بروکریج ہاؤس عارف حبیب لمیٹڈ (اے ایچ ایل) کی رپورٹ کے مطابق شارٹ ٹرم سیونگز سرٹیفکیٹ (ایس ٹی ایس سی) کی شرح منافع میں 26 بیسس پوائنٹس کی کمی کی گئی جس کے بعد نئی شرح 10.14 فیصد ہوگئی ۔

اسی طرح ریگولر انکم سرٹیفکیٹس (آر آئی سی) کی شرح منافع 48 بیسس پوائنٹس کی کمی کے بعد 11.16 فیصد سے کم ہو کر 10.68 فیصد پر آگئی۔

ڈیفنس سیونگز سرٹیفکیٹس (ڈی ایس سی) پر منافع کی شرح 15 بیسس پوائنٹس کی کمی کے بعد 11.76 فیصد سے گھٹ کر 11.61 فیصد ہوگئی۔

بہبود سیونگز سرٹیفکیٹس (بی ایس سی) کی شرح منافع میں 24 بیسس پوائنٹس کی کمی کی گئی جس کے بعد یہ 13.20 فیصد سے کم ہو کر 12.96 فیصد ریکارڈ کی گئی۔

اسپیشل سیونگز سرٹیفکیٹ (ایس ایس سی) اور اسپیشل سیونگز اکاؤنٹ (ایس ایس اے) پر منافع کی شرح میں 20 بیسس پوائنٹس کی کمی کی گئی جس کے بعد دونوں پر اب 10.4 فیصد منافع دیا جائے گا۔

دوسری جانب، سروا اسلامک سیونگز اکاؤنٹ (ایس آئی ایس اے) اور سروا اسلامک ٹرم اکاؤنٹ (ایس آئی ٹی اے) کی منافع کی شرح میں 19 بیسس پوائنٹس کا اضافہ کیا گیا ہے جس کے بعد دونوں کی نئی شرح 9.94 فیصد ہوگئی ہے۔

نیشنل سیونگز آرگنائزیشن پاکستان کا سب سے بڑا مالیاتی ادارہ ہے جو 3.4 کھرب روپے سے زائد کے پورٹ فولیو کا انتظام سنبھالے ہوئے ہے اور ملک بھر میں 376 شاخوں کے ذریعے 40 لاکھ سے زائد صارفین کو خدمات فراہم کررہا ہے۔ یہ ادارہ 12 علاقائی ڈائریکٹوریٹس کے تحت کام کرتا ہے۔

سی ڈی این ایس حکومت کو بجٹ خسارے کی مالی اعانت اور اہم انفرااسٹرکچر منصوبوں کی تکمیل میں مدد فراہم کرتا ہے۔