قلات میں کلیئرنس آپریشن، مزید 4 دہشت گرد ہلاک، آئی ایس پی آر

سیکورٹی فورسز نے ضلع قلات میں جاری کلیئرنس آپریشن کے دوران مزید 4 دہشت گرد ہلاک کر دیے ہیں، جو چند روز قبل اسی ضلع میں اتنے ہی دہشت گرد مارے جانے کے بعد کا واقعہ ہے۔ یہ بات پاک فوج کے شعبہ تعلقات عامہ (آئی ایس پی آر) نے منگل کے روز جاری ایک بیان میں بتائی ہے۔

آئی ایس پی آر کے مطابق بلوچستان کے قلات ضلع میں 19 جولائی کو سیکیورٹی فورسز نے ایک کامیاب انٹیلی جنس پر مبنی آپریشن (آئی بی او) کیا جس میں بھارتی ایجنٹ تنظیم ”فتنہ الہندستان“ کے چار دہشت گرد ہلاک کردیے گئے ہیں۔

اس کے بعد 21 جولائی کو قریبی علاقوں میں ایک کلیئرنس آپریشن کیا گیا جس کے دوران ”فتنہ الہندستان“ کے مزید 4 دہشت گردوں کو تلاش کر کے کامیابی سے ختم کر دیا گیا ہے۔

آئی ایس پی آر نے بتایا ہے کہ اس دوران دہشت گردوں کا ایک ٹھکانہ بھی تباہ کیا گیا اور بڑی مقدار میں اسلحہ، گولہ بارود اور دھماکہ خیز مواد قبضے میں لیا گیا ہے۔

بیان میں مزید کہا گیا ہے کہ پاکستان کی سیکورٹی فورسز قوم کے ساتھ مل کر بھارتی ایجنٹوں کی بلوچستان میں امن، استحکام اور ترقی کو نقصان پہنچانے کی سازشوں کو ناکام بنانے کے لیے پرعزم ہیں۔

دوسری جانب وزیراعظم شہباز شریف نے قلات میں گزشتہ دو دنوں میں سیکورٹی آپریشن میں 8 دہشت گردوں کی ہلاکت پر سیکیورٹی فورسز کو خراج تحسین پیش کیا ہے۔

وزیراعظم نے کہا ہے کہ ہم ان دہشت گردوں کے مذموم عزائم کو مکمل طور پر ختم کر دیں گے جو بے گناہ شہریوں کی جان و مال کو نقصان پہنچاتے ہیں۔

شہباز شریف نے پاکستان کی سالمیت کے دشمن، بھارتی پشت پناہ دہشت گردوں کو جڑ سے اکھاڑ پھینکنے کا عزم ظاہر کیا ہے۔

انہوں نے کہا کہ حکومت اور سیکورٹی فورسز ملک سے دہشت گردی کے خاتمے کے لیے پوری طرح پرعزم ہیں۔