سندھ کا کاشتکاروں کو کھاد اور بیج پر سبسڈی دینے کا اعلان

سندھ حکومت نے بدھ کے روز کسانوں کو کھاد اور بیج پر سبسڈی دینے کا فیصلہ کیا ہے۔

یہ فیصلہ وزیراعلیٰ سندھ سید مراد علی شاہ کی زیر صدارت زراعت، خوراک اور آبپاشی کے محکموں کے اجلاس میں کیا گیا۔

اجلاس کے دوران وزیراعلیٰ مراد علی شاہ نے کہا کہ ان کی حکومت صوبے میں زرعی نظام کو بہتر بنانے کے لیے متعدد اقدامات پر عملدرآمد کی خواہاں ہے، جن میں گندم اور چاول کی فصلوں کے لیے زرعی مواد پر سبسڈی اور فارم میکانائزیشن شامل ہے۔

انہوں نے محکمہ زراعت کو ہدایت دی کہ وہ چھوٹے کسانوں کے لیے چار سالہ پیکیج تیار کرے۔

انہوں نے زراعت، خوراک اور آبپاشی کے محکموں کو ہدایت کی کہ وہ کاشتکاروں کو جدید ٹیکنالوجی، پانی کی دستیابی اور جدید زرعی طریقوں کے بارے میں آگاہی فراہم کرنے کے لیے مشترکہ طور پر کام کریں۔

انہوں نے زور دے کر کہا کہ یہ ضروری ہے کہ کاشتکاروں کو پانی کی دستیابی کا علم ہو تاکہ وہ اس کے مطابق فصلوں کی منصوبہ بندی کر سکیں۔

مزید برآں، وزیراعلیٰ نے اس بات پر زور دیا کہ فارم میکانائزیشن کے تحت ایک سے 25 ایکڑ زمین رکھنے والے چھوٹے کاشتکاروں کے لیے ”لیزر لینڈ لیولنگ“ اور ”مینول سیڈر ہینڈ پشر“ متعارف کرائی جانی چاہیے۔

انہوں نے مزید کہا کہ زمین کی ہمواری (لیولنگ) چھوٹے کاشتکاروں کو کرائے کی بنیاد پر فراہم کی جانی چاہیے۔

وزیراعلیٰ نے کہا کہ لیزر ٹیکنالوجی کے ذریعے زمین کی ہمواری سے آبپاشی کے پانی کا 20 سے 30 فیصد تک بچایا جا سکتا ہے۔

انہوں نے مزید کہا کہ اس طریقے سے پیداوار میں 6 سے 10 فیصد اضافہ ممکن ہے، جب کہ آبپاشی کے وقت میں 50 فیصد کمی کی جا سکتی ہے۔

وزیراعلیٰ نے کہا کہ مجموعی طور پر اس سے آمدنی میں 20 فیصد اضافہ ممکن ہوگا، ساتھ ہی پانی کے کھڑے ہونے (واٹر لاگنگ) اور زمین کی شور زدگی (سالنیت) سے بچاؤ ممکن ہوگا اور زرعی مداخلات کا متوازن استعمال ممکن ہو سکے گا۔