پاکستان اور بھارت کے درمیان مسلسل چوتھی رات ایل او سی پر فائرنگ کا تبادلہ

ہندوستان نے پیر کو دعویٰ کیا کہ اس نے مسلسل چوتھی رات ڈی فیکٹو بارڈرایل او سی کے ساتھ پاکستان کی طرف سے بلا اشتعال فائرنگ کا جواب دیا ہے۔

22 اپریل کے حملے کے بعد جس میں بھارتی غیر قانونی طور پر مقبوضہ جموں و کشمیر میں 26 افراد ہلاک ہوگئے تھے، بھارت نے تین مشتبہ افراد میں سے دو کو پاکستانی قرار دیا ہے۔ تاہم اسلام آباد نے ان الزامات کو مسترد کرتے ہوئے ایک غیرجانبدار تحقیقات کا مطالبہ کیا ہے۔

اس حملے کے نتیجے میں بھارت میں غم و غصہ کی لہر دوڑ گئی اور پاکستان کے خلاف سخت کارروائی کرنے کے مطالبات سامنے آئے ہیں، بھارت اسلام آباد پر مقبوضہ کشمیر میں دہشت گردی کی مالی معاونت اور حوصلہ افزائی کا الزام عائد کرتا ہے۔

جوہری طاقت رکھنے والے دونوں ممالک کے درمیان ایک دوسرے کے خلاف متعدد اقدامات کیے گئے ہیں، بھارت نے اہم سندھ طاس معاہدے کو معطل کر دیا ہے جبکہ پاکستان نے بھارتی طیاروں کے لیے فضائی حدود بند کر دی ہیں۔

بھارتی فوج نے دعویٰ کیا ہے کہ اس نے اتوار کی رات تقریباً بارہ بجے پاکستان کے متعدد فوجی پوسٹوں سے ”بلا اشتعال“ فائرنگ کا جواب دیا ہے۔ تاہم بھارت کی جانب سے مزید تفصیلات فراہم نہیں کی گئیں اور کوئی جانی نقصان کی اطلاع نہیں ملی۔

پاکستانی فوج نے اس حوالے سے کسی بھی تبصرے کی درخواست کا جواب نہیں دیا۔

بھارتی فوج نے حملے کے بعد ملک بھر میں کئی فوجی مشقیں بھی کی ہیں جن میں کچھ روایتی تیاریوں کی مشقیں شامل ہیں۔

مقامی پولیس کے مطابق بھارتی کشمیر میں دہشت گردوں کی تلاش کے دوران تقریباً 500 افراد کو حراست میں لیا گیا ہے جبکہ 1,000 سے زیادہ گھروں اور جنگلوں کی تلاشی لی گئی ہے۔ اب تک کم از کم نو گھروں کو تباہ کیا جا چکا ہے۔

ریاستی سیاسی رہنماؤں نے حکومت سے احتیاط برتنے کی درخواست کی ہے تاکہ دہشت گردی کے خلاف کارروائیوں کے دوران بے گناہ افراد کو نقصان نہ پہنچے۔