بجلی نرخوں میں کمی قوم کیلئے قیمتی تحفہ ہے، مریم نواز

وزیراعلیٰ پنجاب مریم نواز شریف نے بجلی کی قیمتوں میں تاریخی کمی پر صدر مسلم لیگ (ن) نواز شریف، وزیراعظم شہباز شریف اور ان کی ٹیم کو خراج تحسین پیش کرتے ہوئے کہا کہ ہم وزیراعظم شہباز شریف کے اس تاریخی فیصلے کا خیر مقدم کرتے ہیں۔

انہوں نے کہا کہ تاریخ گواہ ہے کہ جب بھی محمد نواز شریف اقتدار میں آئے انہوں نے نہ صرف ملک کو بحرانوں سے نکالا بلکہ عوام کو حقیقی ریلیف بھی فراہم کیا۔

انہوں نے کہا کہ عیدالفطر کے پرمسرت موقع پر بجلی کے نرخوں میں کمی قوم کے لئے ایک قیمتی تحفہ ہے۔ گھریلو صارفین کے لیے 7 روپے 41 پیسے فی یونٹ اور صنعتوں کے لیے 7 روپے 59 پیسے فی یونٹ کمی مہنگائی کے ستائے عوام کے لیے ایک بڑی معاشی سہولت ہے۔ وزیراعلیٰ نے کہا کہ وزیر اعظم شہباز شریف نے بجلی کی قیمتوں میں نمایاں کمی کرکے عوام دوستی اور دور اندیشی کا مظاہرہ کیا ہے۔ بجلی کے نرخوں میں کمی ملکی معیشت اور صنعتوں کی ترقی کے لیے بھی سنگ میل ثابت ہوگی۔

وزیراعلیٰ نے کہا کہ بجلی کے نرخوں میں کمی کا فیصلہ نواز شریف کی عوام سے وابستگی کا اظہار ہے۔ مسلم لیگ (ن) عوام کو ریلیف فراہم کرنے اور پاکستان کو ترقی کی راہ پر گامزن کرنے کے لیے سرگرم عمل ہے۔

انہوں نے کہا کہ وزیراعظم شہبازشریف مسلم لیگ (ن) کے صدر نواز شریف کے وژن کو آگے بڑھا رہے ہیں۔

کاپی رائٹ بزنس ریکارڈر، 2025