وزیر خزانہ نے ریٹنگ ایجنسیوں کے خدشات دور کردئیے

وفاقی وزیر خزانہ محمد اورنگزیب نے ہفتہ کو بیرونی پہلو، افراط زر، بنیادی توازن، اور شرح سود کے نظام پر ریٹنگ ایجنسیوں کے خدشات کو دور کیا۔

ایک پریس ریلیز میں کہا گیا ہے کہ وفاقی وزیر خزانہ محمد اورنگزیب نے ایس اینڈ پی گلوبل اور فچ ریٹنگز کے نمائندوں سے ملاقات کی۔

وزیر نے آئی ایم ایف کے ساتھ دستخط شدہ اسٹینڈ بائی ارینجمنٹ (ایس بی اے) کی بنیاد پر ملک کے مثبت معاشی اشاریوں پر تازہ صورتحال بیان کی۔ انہوں نے مختصر، درمیانی اور طویل مدتی ٹیکس، توانائی اور نجکاری کے ترجیحی شعبوں میں جاری اصلاحات کو اجاگر کیا۔

انہوں نے منیجنگ ڈائریکٹر آئی ایم ایف، صدر، ورلڈ بینک اوراے آئی آئی بی اور اے ڈی بی سمیت دیگر کثیر جہتی اداروں کے ساتھ اپنی ملاقاتوں کا بھی حوالہ دیا۔

وزیر خزانہ نے اس بات کی تصدیق کی کہ موسمیاتی تبدیلی، ڈیجیٹلائزیشن اور انسانی ترقی کے عالمی بینک کے ایجنڈے کو حکومت کی ترجیحات سے ہم آہنگ کیا گیا ہے۔ انہوں نے ممکنہ سعودی سرمایہ کاری کا بھی ذکر کیا جس پر تیزی سے کام جاری ہے۔