مالی سال 2026-27ء، گیس قیمتوں میں اضافے کے لیے درخواستیں جمع

سرکاری گیس کمپنیوں سوئی ناردرن گیس پائپ لائنز لمیٹڈ (ایس این جی پی ایل) اور سوئی سدرن گیس کمپنی لمیٹڈ (ایس ایس جی سی ایل) نے مالی سال 2026-27ء کے لیے گیس کی اوسط مقررہ قیمتوں میں اضافے کی درخواستیں آئل اینڈ گیس ریگولیٹری اتھارٹی (اوگرا) میں جمع کرادی ہیں۔ دونوں کمپنیوں نے قیمتوں میں مجوزہ اضافے کا اطلاق یکم جولائی سے سابقہ ​​تاریخوں سے کرنے کی درخواست کی ہے۔

درخواست میں ایس این جی پی ایل نے گیس کی اوسط مقررہ قیمت میں 10 روپے فی ملین برٹش تھرمل یونٹ (ایم ایم بی ٹی یو) اضافے کی تجویز دی ہے جس کے بعد قیمت موجودہ 1,702 روپے سے بڑھ کر 1,712.40 روپے فی ایم ایم بی ٹی یو ہوجائے گی۔دوسری جانب ایس ایس جی سی ایل نے اوسط مقررہ قیمت میں 366.75 روپے فی ایم ایم بی ٹی یو اضافے کی درخواست کرتے ہوئے اسے بڑھا کر 2,071.75 روپے کرنے کی تجویز دی ہے۔

ایس این جی پی ایل نے گیس کی مجوزہ قیمت میں ایل این جی سروسز کے اخراجات کی مد میں 60 ارب 14 کروڑ 70 لاکھ روپے بھی شامل کیے ہیں۔ کمپنی کے لیے ایل این جی کی لاگت 471.16 روپے فی ایم ایم بی ٹی یو مقرر کی گئی ہے۔

کمپنی نے مؤقف اختیار کیا ہے کہ موسم سرما کے دوران مقامی گیس کی محدود دستیابی کے باعث اضافی گیس کی فراہمی کے انتظامات کرنا ہوں گے۔ اس مقصد کے لیے کمپنی نے 16 ایل این جی کارگو درکار ہونے کا تخمینہ لگایا ہے۔

دونوں گیس کمپنیوں نے عالمی منڈی میں خام تیل کی قیمتوں میں اضافے کو بھی گیس کی قیمتیں بڑھانے کی درخواست کی ایک وجہ قرار دیا ہے۔

اوگرا گیس کی مجوزہ قیمتوں میں ردوبدل کا فیصلہ کرنے سے قبل ایس این جی پی ایل اور ایس ایس جی سی ایل کی درخواستوں پر سماعت کرے گا۔