بھارت میں دیوالی پر شدید زہریلی دھند چھا گئی، آلات فضائی آلودگی کی پیمائش کرنے میں ناکام

بھارت میں دیوالی کے موقع پر فضائی آلودگی اس قدر بڑھ گئی کہ آلودگی کی پیمائش کرنے والے سرکاری آلات کی مقررہ حد سے بھی تجاوز کرگئی، جس کے باعث کئی گھنٹوں تک آلودگی کی مکمل سطح ریکارڈ نہ ہوسکی۔

بھارتی حکام کے مطابق آلودگی کی شدت عالمی ادارہ صحت (ڈبلیو ایچ او) کی تجویز کردہ یومیہ حد سے 66 گنا زیادہ ہوگئی تھی۔ یہ واقعہ ایسے وقت پیش آیا جب اتوار اور پیر کی درمیانی شب آتش بازی کے باعث نئی دہلی میں زہریلے دھوئیں کی چادر چھا گئی۔

اپوزیشن جماعتوں نے الزام عائد کیا کہ حکام نے دانستہ طور پر آلودگی کی ریڈنگز میں کئی گھنٹوں کا خلا رکھا تاکہ صورتحال کی سنگینی چھپائی جاسکے۔ عام آدمی پارٹی کے دہلی صدر سوربھ بھاردواج اور کانگریس رہنما اجے ماکن نے حکومت سے اس معاملے پر جواب طلب کیا۔

تاہم مرکزی آلودگی کنٹرول بورڈ نے الزامات مسترد کرتے ہوئے کہا کہ ڈیٹا میں خلا آلودگی کی پیمائش کرنے والے آلات کی تکنیکی حدود کے باعث پیدا ہوا، اسے حقائق چھپانے کی کوشش قرار نہیں دیا جاسکتا۔

حکام کے مطابق مانیٹرنگ آلات فی مکعب میٹر 1,000 مائیکروگرام تک آلودگی ناپنے کے لیے تیار کیے گئے تھے۔ دوسری جانب عالمی ادارہ صحت نے پی ایم 2.5 کی یومیہ حد 15 مائیکروگرام مقرر کر رکھی ہے۔

مانیٹرنگ ادارے آئی کیو ایئر کے مطابق نئی دہلی کے مندر مارگ علاقے میں آلودگی کی سطح 879 مائیکروگرام فی مکعب میٹر تک پہنچ گئی، جو عالمی ادارہ صحت کی حد سے 58 گنا سے بھی زیادہ ہے۔