پاکستان اور ترکیہ کا علاقائی استحکام کے فروغ کے لیے مذاکرات اور سفارت کاری پر زور

نائب وزیراعظم و وزیر خارجہ اسحاق ڈار اور ان کے ترک ہم منصب حاقان فیدان نے جمعے کو سعودی عرب پر حوثیوں کے حملوں کی مذمت کرتے ہوئے مکہ دفاعی معاہدے کے تحت علاقائی امور پر قریبی رابطہ کاری جاری رکھنے کے عزم کا اعادہ کیا۔

دفتر خارجہ کے بیان کے مطابق استنبول میں ملاقات کے دوران دونوں رہنماؤں نے دوطرفہ تعلقات کا جائزہ لیا اور علاقائی صورتحال، بالخصوص مشرقِ وسطیٰ اور فلسطین کی صورتِ حال پر تبادلہ خیال کیا۔

دونوں رہنماؤں نے علاقائی استحکام کو لاحق خطرات پر تشویش کا اظہار کرتے ہوئے امن و سلامتی کے فروغ کے لیے مذاکرات، سفارت کاری اور مشترکہ کوششوں کی اہمیت پر زور دیا۔

دونوں فریقوں نے پاکستان، ترکیہ اور سعودی عرب کے درمیان دفاعی معاہدے کے تحت تعاون مضبوط بنانے اور باہمی دلچسپی کے مختلف شعبوں میں تعلقات کو فروغ دینے کے عزم کا اعادہ کیا۔

اسحاق ڈار نے آر 4 وزارتی اجلاس اور آر 4 پلس ای 3 اجلاس کی میزبانی پر حاقان فیدان کا شکریہ ادا کیا۔ آر 4 پلس ای 3 اجلاس میں فرانس، جرمنی اور برطانیہ کے وزرائے خارجہ نے بھی شرکت کی۔

اسحاق ڈار نے ترکیہ میں شدید بارشوں کے بعد آنے والے اچانک سیلاب کے نتیجے میں ہونے والی اموات پر تعزیت کا اظہار کیا اور متاثرہ افراد کی جلد صحت یابی کے لیے نیک خواہشات کا اظہار کیا۔

دونوں وزرائے خارجہ نے پاکستان اور ترکیہ کے درمیان دیرینہ دوستانہ تعلقات کی توثیق کرتے ہوئے دوطرفہ اور کثیرالفریقی فورمز پر تعاون مزید گہرا کرنے کا عزم ظاہر کیا۔

آر 4 پلس ای 3 سفارتی مذاکرات

اسحاق ڈار جمعے کو آر 4 اجلاس میں شرکت کے لیے استنبول پہنچے۔ اس اجلاس میں پاکستان، سعودی عرب، ترکیہ اور مصر شامل ہیں۔ اس کے بعد برطانیہ، فرانس اور جرمنی پر مشتمل ای 3 ممالک کے ساتھ مذاکرات ہوں گے۔

دفتر خارجہ کے مطابق ان اجلاسوں میں اہم علاقائی اور عالمی پیش رفت پر توجہ دی جائے گی، جبکہ مشترکہ چیلنجز سے نمٹنے اور علاقائی استحکام کے فروغ کے لیے مربوط سفارتی حکمت عملیوں پر بھی غور کیا جائے گا۔ آر 4 پلس ای 3 اجلاس اپنی نوعیت کا پہلا اجتماع ہے، جس میں ساتوں ممالک اس فارمیٹ کے تحت شریک ہو رہے ہیں۔

استنبول پہنچنے پر اسحاق ڈار کا استقبال ترک وزارت خارجہ کے ڈائریکٹر جنرل اور سفیر جیہاد ایرگینے، پاکستان کے ناظم الامور شائق احمد، استنبول میں پاکستان کے قونصل جنرل خواجہ خرم نعیم، ایڈیشنل سیکریٹری اور سفیر خلیل ہاشمی سمیت دیگر پاکستانی سفارتی حکام نے کیا۔

دورے کے دوران اسحاق ڈار کی ترک صدر رجب طیب اردوان سے ملاقات بھی طے ہے، جبکہ وہ دیگر ہم منصبوں کے ساتھ دوطرفہ ملاقاتیں بھی کریں گے۔