شیڈو فلیٹ پر امریکی پابندیوں میں ممکنہ نرمی، خام تیل کی قیمتوں میں کمی

عالمی منڈی میں جمعے کی صبح خام تیل کی قیمتوں میں کمی ریکارڈ کی گئی، کیونکہ سرمایہ کار مشرق وسطیٰ میں بڑھتی ہوئی کشیدگی اور امریکا کی جانب سے شیڈو فلیٹ پر پابندیوں میں نرمی کے ممکنہ اقدامات کا جائزہ لے رہے ہیں۔

گرینچ معیاری وقت کے مطابق رات 12 بج کر 12 منٹ پر برینٹ خام تیل کے مستقبل کے سودے 41 سینٹ یا 0.39 فیصد کمی کے بعد 105.51 ڈالر فی بیرل پر آگئے، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت 54 سینٹ یا 0.55 فیصد گر کر 97.43 ڈالر فی بیرل ہوگئی۔

جمعرات کو امریکی خام تیل کے ذخائر میں نمایاں کمی کے باعث ڈبلیو ٹی آئی کی قیمت میں 3 فیصد سے زیادہ اضافہ ہوا تھا، جبکہ برینٹ کی قیمت میں معمولی تبدیلی ریکارڈ کی گئی۔

بین الاقوامی توانائی ایجنسی نے جمعرات کو مارکیٹ میں 2 کروڑ بیرل سے زیادہ ڈیزل اور مارچ میں ہنگامی ذخائر سے تیل کی ریکارڈ مقدار جاری کرنے کے بعد باقی ماندہ تیل فراہم کرنے پر اتفاق کیا۔ اس اقدام کا مقصد رسد بڑھانا اور قیمتوں میں اضافے کو روکنا ہے۔

ادھر سعودی عرب اور یمن کے حوثی باغیوں کے درمیان بڑھتی ہوئی کشیدگی اور خطے میں بحری جہازوں پر دوبارہ حملوں نے تیل کی قیمتوں کو سہارا دیا ہے۔ گزشتہ 10 روز کے دوران اہم آبی گزرگاہوں کے اطراف حملوں میں اضافہ ہوا ہے۔

دوسری جانب، امریکی انتظامیہ بعض ایسے تیل بردار جہازوں پر پابندیاں اٹھانے پر غور کر رہی ہے جو روس، ایران اور وینزویلا سے تیل اور پٹرولیم مصنوعات منتقل کرتے رہے ہیں۔ اس اقدام کا مقصد عالمی سطح پر مال برداری کے ریکارڈ اخراجات کم کرنا ہے۔

جمعرات کو حوثی باغیوں نے جنوبی شہر عدن میں صدارتی محل کے احاطے پر میزائل داغے، جس کے نتیجے میں دو محافظ ہلاک ہوگئے، جبکہ سعودی قیادت میں قائم اتحاد نے سعودی تنصیبات پر متعدد حملوں کی تفصیلات جاری کیں۔