پی ایس او کا تیل کی فراہمی کے لیے عمان کی او کیو ٹریڈنگ سے معاہدہ

پاکستان اسٹیٹ آئل (پی ایس او) نے دونوں ممالک کے درمیان بین الحکومتی معاہدے (آئی جی اے) کے تحت پیٹرولیم مصنوعات کی فراہمی کے لیے عمان کی او کیو ٹریڈنگ لمیٹڈ (او کیو ٹی) کے ساتھ خرید و فروخت کا معاہدہ کرلیا ہے۔

سرکاری آئل مارکیٹنگ کمپنی نے جمعے کو پاکستان اسٹاک ایکسچینج (پی ایس ایکس) کو جاری کردہ نوٹس میں اس پیش رفت سے آگاہ کیا۔

نوٹس کے مطابق اسلامی جمہوریہ پاکستان اور سلطنت عمان کے درمیان 14 مئی 2018 کو بین الحکومتی معاہدے پر دستخط کیے گئے تھے۔ اس معاہدے کے تحت عمان کی نمائندگی کے لیے او کیو ٹریڈنگ لمیٹڈ، جس کا سابق نام عمان ٹریڈنگ انٹرنیشنل لمیٹڈ تھا، جبکہ حکومت پاکستان کی جانب سے پاکستان اسٹیٹ آئل کو نامزد کیا گیا تھا۔

نوٹس میں مزید کہا گیا کہ اس معاہدے کے تحت پی ایس او نے پیٹرولیم مصنوعات کی فراہمی کے لیے خرید و فروخت کے معاہدے کا مسودہ حتمی شکل دینے کی غرض سے او کیو ٹریڈنگ سے رابطے کیے۔ پی ایس او کے بورڈ آف مینجمنٹ اور وفاقی کابینہ کی باضابطہ منظوری کے بعد 8 اکتوبر 2026 کو دونوں اداروں کے درمیان معاہدے پر دستخط کردیے گئے۔

پی ایس او اور عمان کی او کیو ٹریڈنگ کے درمیان پاکستان کو اضافی تیل کی کھیپیں فراہم کرنے کے حوالے سے بھی بات چیت جاری تھی۔

اس سے قبل اگست میں کابینہ کی اقتصادی رابطہ کمیٹی (ای سی سی) نے ملک کے توانائی تحفظ اور پیٹرولیم سپلائی چین کو مضبوط بنانے کے لیے پی ایس او اور او کیو ٹریڈنگ کے درمیان معاہدے کی منظوری دی تھی۔ اس معاہدے کا مقصد توانائی کے شعبے میں دونوں اداروں کے تعاون کو فروغ دینا اور وسعت دینا ہے۔

مارچ میں عمان سے پیٹرول کی تین اور ڈیزل کی ایک کھیپ درآمد کی گئی تھی۔ وفاقی وزیر پیٹرولیم نے عمانی سفیر سے پاکستان کو ترجیحی بنیادوں پر توانائی کی کھیپیں فراہم کرنے کے امکان پر بھی بات کی تھی، جس پر عمانی سفیر نے مثبت ردعمل ظاہر کیا تھا۔