پاکستان نے توسیعی رینج کے ’فتح-4‘ کروز میزائل کا کامیاب تجربہ کرلیا

پاک فوج کے شعبہ تعلقات عامہ (آئی ایس پی آر) نے بتایا ہے کہ پاکستان نے مقامی طور پر تیار کردہ ’فتح-4‘ زمین سے داغے جانے والے کروز میزائل کے توسیعی ورژن کا منگل کے روز کامیاب تجربہ کرلیا ہے۔

آئی ایس پی آر کے مطابق ’فتح-4‘ میزائل جدید ایویانکس اور جدید ترین نیویگیشن نظام سے لیس ہے۔

آئی ایس پی آر نے کہا کہ ’’یہ ہتھیاروں کا نظام توسیعی فاصلے تک اہداف کو انتہائی درستگی اور مؤثر تباہ کن صلاحیت کے ساتھ نشانہ بنانے کی صلاحیت رکھتا ہے۔‘‘ آئی ایس پی آر کے مطابق تجربے کے دوران درستگی بہتر بنانے اور میزائل کی بقا کی صلاحیت بڑھانے کے لیے مختلف ذیلی نظاموں میں شامل اضافی تکنیکی پیرامیٹرز کی بھی جانچ کی گئی۔

تجربے کا مشاہدہ پاک فوج کے اعلیٰ افسران کے علاوہ میزائل تیار کرنے والے ادارے کے سائنس دانوں اور انجینئرز نے کیا۔

آئی ایس پی آر نے بتایا کہ صدر آصف علی زرداری، وزیراعظم شہباز شریف، چیف آف ڈیفنس فورسز فیلڈ مارشل عاصم منیر اور سروسز چیفس نے کامیاب تجربے پر متعلقہ ٹیموں کو مبارکباد دی اور ان کی تکنیکی مہارت، لگن اور عزم کو سراہا۔