ترکیہ کا مکہ دفاعی معاہدے کی کمیٹی کے اجلاس کا اعلان

ترک وزارت خارجہ نے بتایا ہے کہ ترکیہ، سعودی عرب اور پاکستان کے درمیان مکہ دفاعی معاہدے کی ایک کمیٹی پیر کو ریاض میں اجلاس کرے گی، جس میں ترک وزرا بھی شرکت کریں گے۔

سعودی حمایت یافتہ یمنی حکومت کے سربراہ نے اتوار کو حوثیوں کے خلاف بڑے فوجی آپریشن کے آغاز کا اعلان کیا، جس کا مقصد حوثیوں کے زیر کنٹرول علاقوں پر قبضہ کرنا ہے۔

پاکستان کے وزیر خارجہ محمد اسحاق ڈار نے جمعہ کو کہا تھا کہ ایران نے حوثیوں کے حملوں کے بعد ان کے ساتھ سیاسی طور پر بات چیت کی تجویز دی ہے، اس تجویز پر مکہ دفاعی معاہدے کی کمیٹی رواں ہفتے ریاض میں ہونے والے اجلاس کے دوران غور کرے گی۔

ترک وزارت خارجہ نے اپنے بیان میں کہا کہ اجلاس میں خطے کی حالیہ پیش رفت اور اتحاد کو ادارہ جاتی شکل دینے کی کوششوں میں ہونے والی پیش رفت کا جائزہ لیا جائے گا۔

بیان کے مطابق ترک وزیر خارجہ ہاکان فیدان، وزیر دفاع یشار گولر اور چیف آف جنرل اسٹاف جنرل سلجوق بایراکتاروغلو معاہدے کی اسٹریٹجک سیاسی و دفاعی کمیٹی کے اجلاس میں شرکت کریں گے، جبکہ پاکستان اور سعودی عرب کے حکام بھی اجلاس میں شریک ہوں گے۔